78. De sancta Cruce.

Crux bona, crux digna, lignum super omnia ligna,
Me tibi consigna salvans a morte maligna.
Aeneas hic coluber, cruce lugubris, ipse saluber
Atque cruore ruber, variis affectibus uber,
5. Omne fugat tuber et culpae nexile suber,

Hunc puer, hunc puber, hunc canus sugat ut uber.
Qui stas pro mundo nudatus corpore mundo,
Iesu, profundo gemitus tibi corde profundo.
Nulla tibi vestis, qui caelum sidere vestis,

10. O rex caelestis, sic tu sociare scelestis?
Sors nostrae sortis bellator et optime, fortis
Tu victor mortis Satanae pravaeque cohortis,
In cruce qui moreris, veniam ne dando moreris,
Per clavos teneris manibus pedibusque teneris,

15. Corde pio miseris, qui te cruciant, misereris,
Dum mala non queris sed dimitti sibi quaeris,
In te confisi socium reprehendere nisi
Ad duo verba nisi praebens aditum paradisi.
Latroni iuveni quod dat contritio sera,

20. Hoc mihi, quaeso, seni donet confessio vera.
Sit meus hic frater tibi filius, inclita mater,
Et tibi sit mater genetrix mea, tu pie frater.