81. Oratio de Armis Christi.

1. Salve, praeclara, inclita,
Armatura dulcissima
Christi Dei et hominis,
Pro nobis passi miseris.

2. Salve, Christi venditio,
Cum cultro et praeputio
Sudoreque sanguineo,
Cum gallo, Christi captio.

3. Salve, columna nobilis,
Cum flagellis et vinculis,
Sacrata almo sanguine
Ex Christi fuso corpore.

4. Salve, vestis purpurea
Et cuncta Christi vulnera,
Cum effluente sanguine,
Quo redimuntur animae.

5. Salve, alba et colaphi
Ac velamentum oculi,
Sputa quoque et alapae
Illata bino tempore.

6. Salve, mortis sententia,
Crux, clavi, scala, lancea,
Distensio, ludibria,
Acetum, fel et spongia.

7. Salve, arundo, titulus,
Corona, forfex, malleus,
Omnis dolor et passio
Christi et exspiratio.

8. Salve, matris compassio,
Nati quoque propassio,
Fons duplex eius lateris
Nos lavans, ornans gratiis.
9. Salve, sepulcrum nobile,

Lintea cum aromate

Et quaeque Christi reliqua
Passionis insignia.

10. Haec cuncta tuae dulcia
Passionis insignia,
Dulcis Iesu, glorifico,
Adoro et magnifico.

11. Haec cuncta fugent noxia,
Aboleant peccamina,
De manu quoque daemonum
Nos salvent in perpetuum.

12. Praestent hic pati tristia,
Humilient praecordia,
Confirment nos in gratia
Coronentque in gloria.