86. De Resurrectione D. N.

1. Gloria tibi, Domine,
Qui matutino tempore
Illuxisti de tenebris,
Surrexisti a mortuis.

2. De morte factus potior
Mortem vicisti fortior,
Tu innumerabilia
Eripuisti spolia.

3. Remotus ensis flammeus
Atque Cherubim igneus,
Est paradisus redditus
Ac regni caeli aditus.

4. Per te nostra mortalitas
[Est facta immortalitas]
Est tua resurrectio
Ad vitam reparatio.

5. Christe, cuius perpetuum
Est regnum et imperium,
Tui triumphi gloria
Fac nostra sit victoria.

6. Nos rediens de tartaro
Adiunge regno supero,
In tuo semper agmine
Nostrae resultent animae.

7. Concede nobis munere
Resurrectionis tuae
Per abundantem gratiam
Gaudium et laetitiam.

8. Gloria tibi, Domine,
Qui surrexisti a mortuis,
Cum patre et sancto spiritu
In sempiterna saecula.