88. De Resurrectione D. N.

1. Imago trini numinis

et forma claritatis,
Qui illustras Ierusalem

et domum caritatis,
Tu plenitudo gaudii

redemptis et vocatis,
Qui contemplantur laetius

te Deum maiestatis

2. Ave, caeli speculum

et donum aeternorum,
Qui trahis in te suavius

aspectum beatorum,
Tu olim maculatus es

per sputa impiorum,
Pro me, pie, caesus es

palmis perditorum.

3. Nunc, o lumen caelicum

et vultus deitatis,
Te redde desiderio

universitatis,
Quem hoc die gaudii

nostrae sollemnitatis
Exspectat amor omnium

ut regem aeternitatis.
4. Guttur suavissimum,

organum caelorum,
Quod pro me raucum reddidit

labor tormentorum,
Te saluto intimis

votis praecordiorum,
Per quem reserata sunt

bona secretorum.

5. Aures nobilissimae

insignis auditoris,
Quae non spernunt pauperis

precem peccatoris,
Repletae sunt opprobriis

in tempore maeroris,
Sed nunc abundant gaudio

in laudibus honoris.

6. Dum dies excellentiae

invexit iucunditatem
Et pro contemptus genere

dat sublimitatem,
Dum verbum ens altissimi

audit paternitatem:
Mea surge gloria,

assume claritatem.
7. Odor suavis narium

caelestis odoratus,
Quae cordium dulcedine

fit saepe delectatus,
Sed impiorum sordibus

est quondam molestatus,
Est in caelesti gloria

nunc plene dulcoratus.
8. Salve, os dulcedinis

et dilectionis,
Tu placas iram perditis

divinae ultionis
Per haustum amarissimae

murratae potionis
Pro amaritudine

exspirationis,

Quam de torrente biberas
in via passionis.