93. De Corpore Christi.

1. Ave, Iesu, pastor bone,
Qui tuos commestione

Pascis carnis propriae,
Quam devote manducare
Atque digne salutare

Mihi detur hodie.
2. Ave, caro Christi viva,
Sanitatis effectiva,

Virtuosa, sapida
Piae menti, quae te amat
Et suspirans ad te clamat

Fame tui languida.
3. Ave, caro, cibus grandis,
Ad salutem educandis

Datus exsulantibus,
Ut in via sustententur,
Donec plene satientur

Iuncti caeli civibus.

4. Ave, panis, quo Elias
Confortatus grandes vias

Montis Dei ambulat.
Posce mentem consolando,
Quae ad caelos properando

Carnis massam baiulat.

5. Ave, caro delicata
Deitatis, saginata

Adipe dulcissima,
Tu mel petrae, lignum viti
Man caeleste, corpus mite,

Veritatis azyma.

6. Ave, caro Christi crassa,
Igne passionis assa

Crucis in craticula,
Cuius gustu saporatum
Horret animae palatum

Aliena fercula.
7. Ave, grande condimentum,
Brevi vasculo contentum,

Medullatum epulum,
Grandis lasso via restat,
Exspectatio molestat,

Da gustare pabulum.

8. Ave, similago pura,
Liba frixa assatura

David et coliria,
Per te cordium albescant
Fusca, tepida calescant,

Impinguescant marcida.