100. De Corpore Christi.

1. Iesu benignissime,

fons amoris casti,
Tu mortales homines

in tantum amasti,
Quod te ipsum credulis

in cibum donasti
Et, ut tui memores

te sumant, mandasti.

2. Christe benignissime,

fili summi Dei,
Precor, indignissimi

miserere mei,
Tantum caritatis da,

fidei et spei,
Ut digne mysterium

sumam tantae rei.
3. Quid hinc reddam gratiae,

quod me sic dotasti,
Quem tu ministerio

tanto deputasti
Ac indignum miserum

semper tolerasti
Et cum tuis famulis

manere donasti.

4. Heu, mihi, quid faciam,

o summa dulcedo,
Quia indevotus sum,

dum te ipsum edo?
Heu, nimis culpabilis

et durus accedo,
Heu, ad illud durus sum

durusque recedo.
5. O Iesu, quid faciam

vermis et putredo,
Cuius mentem opprimit

peccati nigredo?
Me ministrum dignum fac,

Deus, in quem credo,
Pro amore virginis

matris intercedo.
6. Mirum est certissime,

quod te comedendo
Anima non liquefit

pure diligendo,
Sed, heu, e contrario

dura est tependo
Nec mollire valet se

paululum deflendo.

7. Parce mihi, Domine,

pie tribuendo,
Ut compungi iugiter

queam te sumendo,
Semper matrem virginem

diligam colendo,
Tuam cenam ultimam

in mente tenendo.