102. De Corpore Christi.

1. Salve, verbum incarnatum,
Hic in ara consecratum
Et pro nobis immolatum.

2. Salve, panis angelorum,
Salve, cibus electorum,
Dulcis gustus supernorum.

3. Salve, caro Iesu Christi,
Quae de morte redemisti,
Quos in fine dilexisti.

4. Salve, sanguis pretiose,
Rogo, lava copiose,
Quod commisi vitiose.

5. Salve, Iesu, fili Dei,
Tota salus meae spei,
Rogo, miserere mei.

6. Rogo, fac me manducare
Carnem tuam, qua mundare
Me digneris et sanare.

7. Sis virtutum incrementum,
Vitiorum purgamentum,
Contra hostes firmamentum.

8. Praesta mihi veram pacem,
Carnis, mentis sanitatem,
Panis vitae suavitatem.

9. Et da mihi sensum purum,
Fac in morte me securum,
Post hanc vitam intraturum
In caeleste gaudium.