106. Metra de Sacramento Eucharistiae.

Hostia praeclara cordis mactatur in ara
Estque Deo cara, quanto plus fiet amara.
Nos, quia peccamus, medicamine semper egemus ;
Hanc pro peccatis medicinam semper habemus.
5. Viscera munda para, qui pasci quaeris in ara,
Astans altari, pia mens, gaude lacrimari,
Libens libari, sacrans curato sacrari,
Agnum sumpturus sis omni crimine purus
Nec prius hinc capias, quam flendo victima fias;

10. Primum te luctu, post vitae pascito fructu.
Est cum lactucis agrestibus agnus edendus
Nec nisi cum lacrimis et cum gemitu capiendus ;
Lacrima dat risum, lavat artus, dat paradisum.
Cum bene plorasti, cum te lacrimis satiasti,

15. Mande saginatum vitulum de virgine natum;
Pastus eo rite properes ad pascua vitae.