113. De Spiritu Sancto.

1. Sancte, veni, corda leni
Ac subveni, paraclite,
Veni, clare, et dignare
Dulcis dare pignus vitae.

2. Veni dita et invita
In hac vita nos pie,
Da veniam, da gratiam,
Da copiam laetitiae.

3. Nos complue et ablue
Et indue divinitus,
In communi pace uni
Triuni nos funditus.

4. Da socium humilium

Et proprium te convivam,
Pota mentem sitientem
Et quaerentem aquam vivam.

5. Fac humidam hanc aridam
Et floridam virtutibus,
Da humorem, da calorem,
Da virorem cum fructibus.

6. Corda munda et fecunda,
Roris unda salutaris,
Da cor latum, da optatam
Pacis datum singularis.

7. Sana vanum, serva sanum
Cor humanum, pax superna,
Da medelam, da cautelam,
Da tutelam, lux interna.

8. In hoc festo tuis esto

Intus praesto per gratiam,
Tua lege tuam rege,
Rectam tege familiam.

9. Corda fove, linguas move,
Dator novae libertatis,
Doctor bone, unione
Nos compone caritatis.

10. Melliflui potus tui

Fac nos frui dulcedine,
Nil melius, nil mitius,
Nil dulcius te, Domine.

11. Nos pariter, nos dulciter,
Nos iugiter inebria,
Manna verum et sincerum,
Misce merum cum copia.

12. Mentes unge et compunge
Et coniunge, vis amoris,
Tu es pium refugium,
Gaudium peccatoris.

13. Spira gratis fatigatis

Dulce satis, sanctum flamen,
Te laudamus et optamus,
Ut vivamus in te. Amen.