115. De Christo D. N. et Spiritu Sancto.

1. Tu, Christe, nostrum gaudium,
Amor et desiderium,
Deus creator omnium,
Tu esto nostrum gaudium.

2. Iesu, redemptor omnium,
Homo factus ex Maria,
Tu esto nostrum gaudium
Mundana vincens gaudia.

3. Cui magi ferunt munera
Supplices ad praesaepium,
Tu scandis supra sidera
Nostrum futurus praemium.

4. Qui caeli pandis ostium
Patris sedens in gloria,
Ad hinc promissum gaudium
Da exspectata gaudia.

5. Cuius suxisti ubera,
Eius prece paraclitum
Demitte, patris munera
Sanctum daturus spiritum.

6. Mitte eius solacia,

Cui damus in praeconium:
"Beata nobis gaudia"
Et "esto nostrum gaudium."

7. Ad regni caeli solium
Nos erige clementia,
Ubi sollemne gaudium,
Ubi vera sunt gaudia.

8. Perque septem insignia,
Septem largitor munium,
Da gaudere in patria,
Da sempiternum gaudium.