116. Te Deum de Spiritu Sancto.

1. Te laudamus orphanorum
Spiritum paraclitum,
Pectora apostolorum
Qui ditasti nimium,

2. Te iuvante fidem Christi

Quod monstrarunt saeculis
Et fecerunt, quae iussisti,
Nunc te laudant canticis.
3. Numerus te prophetarum
Laudat super aethera,
Quos fecisti figurarum
Intonare vetera.
4. Martyresque te laudare

Non cessant cum gaudio,
Quos curasti confortare
In omni supplicio.

5. Te ecclesia fidelis

Collaudat hymnidice
Tam in terra quam in caelis,
Cui fons es gratiae.

6. Nosque pie te laudamus
Iubilo cum mentium,
Dare donum te oramus
Septenorum munerum.

7. Fac nos Dei in timore,
Quae sunt recta, agere,
Proximi et sub amore
Pietati vivere.
8. Fac scientiam sitire,
Opera iustitiae,
Fortitudinem, subire
Iugum patientiae.
9. Fac consilio pensare,
Vitare malitiam,
Intellectum penetrare
Ad Dei notitiam.

10. Sapienter gubernare

Fac nos nostra opera,
Ut possimus impetrare
Partem super aethera.
11. Unum tecum pater, natus
In misericordia
Nostros deleat reatus,
Ut absque vecordia
12. Deum semper diligamus
Perfecte et proximos;
In te, Domine, speramus,
Salva tuos famulos.