128. De Nomine beatae Mariae V.

1. In adplausu virginis
Novi melos carminis

Levet cor in gaudium,
Parum cernit luminis,
Qui Mariae nominis

Ignorat mysterium.

2. Nam sonat amarum mare,

Docens nihil nos amare

Carneae libidinis,
Istud mare non amare
Sapit, sed in ipso clare

Viget fons dulcedinis.

3. Sonat idem domina,
Tua sunt nam culmina

Caeli, terrae, marium;
Caeli substant agmina
Tibi, mundi machina,

Tuum sunt imperium.

4. Idem sonat maris stella,
Nam nunc motu, nunc procella

Navibus absconderis,
Surgant venti, stipent bella,
Pietatis semper cella

Parens es tu miseris.
5. Huius influentia

Stellae magnes gravia

Trahit ferri pondera,
Sic Mariae gratia
Corda levat gravia.

6. Obsoletis noxiali

Mentibus fuligine
Redde vestem, virgo, textam

Virginali vellere,
Candidatam victimali

Mitis agni sanguine.

7. O Maria, subveni
Peccatori misero,
Te benignam inveni,
Virgo, non te desero.

8. Ora pro me, mater fortis,
Patrem, natum hora mortis,

Virgo et puerpera,
Ne me trahat saevae sortis

Inimicus vinclis tortis,
Lac profer et ubera.