129. De Nomine beatae Mariae V.

1. Magna, maior, maxima,
Regalis genetrix,
Regis regum optima
Parens et alitrix.

2. Creatorem Dominum
Creatura portans,
Mundum plenum sanguinum
Es virgo supportans.

3. Magnum mare, Maria,
Es et spatiosum,
Quo secura est via
Iterque planosum.
4. Mare servans, nutriens
Pisces condecenter,
Hoc est stare faciens
Mundos innocenter.
5. Mare mundans immundos
Faece peccatorum,
Mare reddens fecundos
Victus proximorum.
6. Mare, quod est plenum
Gemmis medentibus,
Quae pellunt venenum
Eas ferentibus.

7. Mare, inquam, redundans
Sine periculo,
Cunctis bonis abundans
Inunda famulo.

8. Tanti maris rivulis
Ipse tam conscius
A cunctis maculis
Laver interius.

9, Et cor meum foetidum
Nimis indecenter,
Virgo, purum, nitidum
Facias clementer.

10. O magna fiducia,
Tutum refugium,
Discreta prudentia,
Certum consilium.

11. O cunctis fidelior,
Fida fidelibus,
O melle suavior,
Dulcis pauperibus.
12. Currenti mentaliter
Ad te sis obvia,
Subveni celeriter,
Fias propitia.
13. Numquid [tu] non poteris
Mox Iesum placare,
Cum ipsum merueris
Sola tu portare?
14. Credo sine dubio,

Quod, quidquid rogabis,
Id a tuo filio

Statim impetrabis.

15. Vere tuis meritis
Potes liberare
Mox me cunctis debitis
Et bene ditare.

16. Ergo mihi, rogito,
Postulare velis
Divitias a genito,

Quae fluunt e caelis.