133. De Annuntiatione BMV.

1. Grata Deo o ancilla,

Cuius verbo dum consentis,
In iucunda hora illa

Verbum caro factum sentis
Per virtutem obumbrantem,
In te Christum tunc formantem.

Animam fac depingentis
Hanc annuntiationem
Infra caeli mansionem

Vita frui resurgentis.

2. O maestorum consolamen,

Pro adflictis quibuscunque,
Qui ad tuum sublevamen

Huc concurrunt undecunque,
Ora, virgo benedicta,
Gratiae dono sic dicta,

Quia reis quibuscunque,
Licet tibi tam ingratis,
Gratiam Dei das gratis

Ac indignis quantumcunque.

3. O virgo, quae meruisti

Exaltari apud eum,
Cuius natum genuisti,

Redempturum omnem reum,
In angusta mortis porta,
Te precor, me sic supporta

Spiritum sumendo meum,
Ut tunc plenum pietate
Gratia et veritate

Clara luce cernam Deum.