136. De Visitatione BMV.

Virgo Dei genetrix, nostrae vitae reparatrix,
Caelica regina, praefulgens stella marina,
Semper laudanda, cui laus non sufficit ulla;
Namque tuas laudes minime depromere possent,
5. Omnia si linguae mundi creata forent.
Praesenti festo laudes cape, quas tibi praesto
Et tibi corde promo, sono, simul ore iucundo.
O mater Christi, postquam tu, virgo, fuisti
Caelitus adfata, verbo Domini gravidata,

10. Exsurgis propere, montana petis, Zachariae
Uxorem quaeris, sed huic bona munera geris,
Prolem laetificas, dum matrem virgo salutas.
Pneumate repletam, cum fructu te benedictam
Nuntiat admirans, te prae cunctis fore sanctam.

15. Tunc, virgo celebris, genetrix clarissima Christi,

Magnificans Dominum caeleste melos cecinisti.
O mundi domina, tibi laus hodie super astra.
Vas deitatis, fons pietatis, lucis imago,
Virgo decoris, fructus honoris, sancta propago,

20. Filia prolis, ianua solis, regis amica,

Lux tenebrarum, spes animarum, virgo pudica,
Sacra sacrarum, pulchra rosarum, flos sine spina,
Munditiae flos, laetitiae ros et medicina,
Fructificans mons, mellificans fons, gemma decora,

25. Virgula turis, normala iuris, nardus odora,
Caelica clavis, virgo suavis, vera lucerna,
Iustitiae dux, laetitiae lux, porta superna,
Cellula mellis, nescia fellis, dulcis amanti,
Dura malignis, grata benignis, blanda precanti,

30. Regula morum, forma bonorum, femina digna,
Meta laborum, pax odiorum, virgo benigna,
Pulchra puella, caelica cella, regula legis,
Dulcis, amabilis et venerabilis, virgula regis.
O iuvenis praegnans, vetulae famulans parienti,

35. Virtum speculum, te corde precor sitienti,

Nostram nunc animam Dominum fac magnificare,
Spiritus ut noster queat in Domino iubilare,
Et sic in hoc festo facias nos humiliatos,
Ut post hanc vitam contingat esse beatos.

40. Qui tibi magna dedit, cuius est nomen benedictum,
Per te det veniam famulis trementibus ipsum,
Exaltans humiles, ponens de sede potentes,
Evacuans divites, implens simul esurientes;
Israel accipiat pueros per te memoretque

45. Pacto, quod pepigit patribus Abrahae seminique.
Pulsatis vitiis, victis cunctis inimicis
Per te, virgo pia, capiamus caelica regna.