141. De Partu Virginis.

1. Gaude, admirabilis,
Virgo venerabilis,

Quae paris intacta.
Sine viri coitu,
Plena sancto spiritu,

Genetrix es facta.
2. Cardine de supero
Rore salutifero

Venter fecundatur,
Peperit fecunditas,
Et sacra virginitas

Integra servatur.

3. Sicut ros in gramine
Descendit in virgine

Verbum summi patris,
Patrem non deseruit
Et mortalem induit

Formam alvo matris.
4. Sicut terram pluvia,
Sic divina gratia

Virginem fecundat,
Sanctus eam spiritus
A peccato penitus

Abluit et mundat.

5. Non est opus hominis,
Sed est opus numinis
Et magnae virtutis,
Concipit et generat,
Quae virum non noverat
Auctorem salutis.