146. De Partu Virginis.

Salve, flos, qui salvas nos virtutis odore,
Flos candens, fructum pandens remanente decore.
Salve, flos, cui caeli ros vim fructificantem
Sic tribuit, quod non minuit speciem rutilantem.
Salve, flos, cui lex et mos naturaque cedit,
Quando paris, non fuscaris, nec forma recedit.
Tu niveus, tu virgineus flos, alma Maria,
Quam mundat et fecundat divina sophia.
Productus tuus est fructus non te violata,
Ventre tuo miranda duo simul sunt sociata;
Integritas et fertilitas, duo dissona, rite
Consona sunt et conveniunt in te sine lite.
Sancta phoenix, virgo genetrix, quia nulla secunda,
Concipiens et parturiens manes integra, munda.
Quam nisi te transcendere se natura stupescit?
Quae nisi tu sine concubitu fecunda tumescit?
Quae praegnans opus ignorans, in quo violetur,
Quae pariens nil experiens, in quo crucietur,
Sola tenes castos renes, quando gravidaris,
Nec quereris nec torqueris, cum fasce levaris.
Conceptus tuus et partus non sunt generales,
Hic coitu caret, hic gemitu, tibi sunt speciales.
Dum generant aliae, temerant decus integritatis,
Te sequitur nec conteritur flos virginitatis.
Dum pariunt aliae, plangunt, tu nescia planctus,
Cui natus sine sorde datus per omnia sanctus.

Corporei domus esse Dei sine labe mereris,
Ingressus fit et egressus, sed clausa teneris.
Ingreditur, qui concipitur, qui nascitur, exit,
Sed salvam servans valvam claustrum bene texit.
Producis dominum lucis, qui te penetravit
Ut vitream nec virgineam portam violavit.
Sublimem gestas humilem magnumque pusillum,
Nam rerum Dominum verum virtus probat illum.
Amne rigas pannisque ligas, quo vincla reorum
Laxantur, quo mundantur sordes animorum.
Stella poli, regina soli, tu proxima soli,
Digna coli, sine nube doli, me spernere noli.
Flos florum, fons hortorum, regina polorum,
Spes veniae, lux laetitiae, medicina dolorum;
Ave, Dei clavis fidei requiesque laborum,
Clara dies, secura quies et regula morum ;
Virga recens virgoque decens, tu forma bonorum,
Alma parens, tu labe carens spes atque reorum,
Prece reis opem fer eis pro pace eorum,
Pasce tuos, succurre tuis, miserere tuorum.