150. De Vocabulo Purificationis BMV.

1. Festum, quod nobis imminet,

Purificationis
Hoc sacramentum continet

Sanctae religionis,

Ut, quidquid actionis
Pravae mens in se retinet,
Totum virtus eliminet

Purae confessionis.

2. Ob hoc purgari voluit
Maria stella maris,
Quae nil purgandum habuit
Velut ignara maris,
Ut tu, qui macularis
In his, quae lex prohibuit,
Confitendo, quod polluit,
Mundus efficiaris.

3. Consignat haec mysteria
Sub numero sacrato
Dies quadragenaria
Te bene subiugato
Decalogi mandato,
Quod quadrant evangelia,
Ut septiformis gratia
Stet in te pede rato.

4. Verbum patris a virgine
Dum patri praesentatur,
Ut hominis ab homine
Redemptor redimatur,
Per hoc insinuatur,
Ut cum in tuo nomine
Fit bonum opus, Domine,
Tibi laus ascribatur.

5. Oblata legis redditur,

Cum cor simplex et maestum,
Par columbarum geritur,

Ad omnia modestum,

Vincens omne molestum,
Par turturum adicitur,
Cum caritatis sequitur,

Sed carnis fugat aestum.

6. Quinque siclis redimitur

Oblatio legalis,
Quando sensus subicitur

Spiritui carnalis,

Ut fiat spiritalis,
Sic suus Deo solvitur
Regique regnum redditur

Denarius regalis.

7. Sic bonis tergens actibus

Vitae corruptionem
Velut apum operibus

Stuppae collectionem,

Ad pacis visionem
Procedes cum luminibus,
Christum portans in manibus

Sequensque Simeonem.