156. De Compassione BMV.

1. In templo Ierusalem
Christo praesentato
Plenus ille Simeon
Spiritu sacrato

2. Tuam, inquit, animam
Gladius transibit,
Nec quidquam de omnibus
Istis praeteribit,

3. Quin patrentur singula
A me nunc praedicta,
Audi, mater regia,
O mater invicta.

4. De ferro vel de calibe
Nihil prophetavit,
Sed doloris gladium
Vere denotavit,

5. A quo tua anima
Acrius est laesa,
Quam si sic in corpore
Tuo esses caesa,

6. Carnem hanc dum cerneres,
Quam tu concepisti
Et tuo virgineo
Lacte nutrivisti,

7. Flagellatam undique
Virga duriori,
Plagas plagae additas,
Livores livori,

8. Adfixum patibulo
Clavis laniari
Morteque pallescere,
Latus vulnerari.

9. Ubi ensis Simeon

Te tunc vulneravit,
Tuam sanctam animam
Dire penetravit.

10. Nunc ergo misericors
Virgoque benigna
Omni plena gratia,
Omni laude digna,

11. Te precamur supplices
Tuique doloris
Gladius nos vulneret
Die septem horis,

12. Ut sic tuo gaudio
Filiique tui
In aeterna gloria
Mereamur frui.