162. De Compassione BMV.

R Dic, Maria, quid vidisti

Contemplando crucem Christi?

1. Vidi Iesum adligatum,

Sic aspexi dulcem natum

Vinctum duci ad Pilatum

Peccatorum manibus.

2. Vidi turbam cognitorum

Undecim apostolorum

Gravi metu Iudaeorum

Christum derelinquere.

8. Vidi Petram sic ferocem

Dantem morti se per vocem

Formidasse servae vocem

Ter negantem Dominum.

4. Vidi Petrum paenitentem

Et amaros fletus dantem,

Lacrimando se pulsantem

Tunc, cum gallus cecinit.

5. Vidi coram tribunali,

Quem figebant testes mali,

Pro responso quali, quali

Alapa contunditur.

6. Vidi Iesum flagellari,

Heu, spinis coronari,

Illudendo blasphemari,

Meum dulcem filium.

7. Vidi eum deformatum,

Per flagella maceratum

Pondere crucis gravatum

Dorso eius proprio.

8. Vidi Iesum spoliari

Et in cruce sublevari,

Tali more condemnari

Pro mundi criminibus.

9. Vidi Iesum exaltatum,

Dumis caput coronatum,

Latus sacrum perforatum,

Aqua, sanguis profluunt.

10. Vidi "Heli" ter clamantem,

Sitim felle refoventem,

Vatum scripta consummantem,

Tunc emisit spiritum.

11. Vidi pravos illudentes,

Verbis ad eum clamantes,

Regem ipsum ignorantes

Supernorum civium.

12. Vidi tunc me desolari,

Nimis corde conturbari

Et Iohanni commendari;

Dolor me transverberat.

13. Vidi solem obscurari,

Terram nimis conquassari,

Monumenta reserari

Morte dulcis filii.

14. Vidi de cruce sublatum

Vitae fontem sic fuscatum,

Monumento tunc illatum,

Quem Ioseph recondidit.

15. Vidi Christum resurgentem,

Claustra mortis infringentem,

Protoplaustos liberantem

Fracto mortis vinculo.

16. Vidi caelos conscendentem,

Portam regni iam pandentem

Et ad vitam nos vocantem

In caeli palatio.

17. Nunc te rogo, mater Christi,

Fer medelam mihi tristi

Eius, quem caste concepisti,

Sic facta memoria.