165. De V Doloribus BMV.

1. Maria dulcis, miseros
nos audi loquentes,
Has quinque tristitias
tibi referentes.

2. Primam fers tristitiam
templum te intrante,
Dum prophetat Simeon
de ense vulnerante.

3. Secundo luctus oritur,
quando rediisti,
Natum in Ierusalem
quando perdidisti.

4. Dum hunc captum prospicis
ternus dolor crescit,
Dum materna caritas
subvenire nescit.

5. Quarto tuo animo
valde sauciaris,
Hunc pendentem publice
dum cruce specularis.

6. Quinta fit maestitia,
dum ipse defunctus
Cruce tuis brachiis
natus est coniunctus.

7. Per has quinque tristitias
ablue maerorem
Atque nos ad caelicum
transfer nunc amorem.

8. Et quia statum mundi
nescimus meliorem,
Post hanc vitam animas
ad summum duc honorem.