167. De VII Doloribus BMV.

1. Ave, virgo, gemuisti,
A Simeone dum audisti,
Cuius doloris gladio
Transgladieris animo;

Fac nos pro nostro scelere,
O pia mater, gemere,
Ne in peccati pulvere
Obdormiamus temere.

2. Ave, virgo, quae dolebas,
In Aegyptum dum fugebas
Ab Herodis imperio
Cum Ioseph atque filio;

Sic a peccatis omnibus
Et a daemonis nexibus
Fac nos solutos libere
Ad tunm natum fugere.

3. Ave, mater, per triduum
Dolendo tuum filium
Inter cognatos quaerebas,
Hunc in templo sed cernebas;

Fac nos Iesum quaerere
In praesenti curia
Et post mortem cernere
In paradisi gloria.

4. Ave, virgo, quae maerebas
In spiritu, dum cognoscebas
A Iudaeis captivatum
Dulcem Iesum, tuum natum;

Sancta mater, istud age,
Captum in peccatis trahe
A peccatorum sarcina
Ad superna gaudia.

5. Ave, virgo, quae flevisti,
Dum secuta tu fuisti
Crucifigendum filium
Euntem ad supplicium;

Fac nos, mater, tecum fiere,
Crucifixo condolere,
Ut crucifixum filium
Sequamur in perpetuum.

6. Ave, quae planxisti natum,
Dum vidisti desolatum
Poenis ut latro pendentem
Et in cruce morientem ;

Tuo planctu contristatos
Fac nos tecum plangere,
Eius cruce consignatos
Poenasque recolere.

7. Ave, martyr martyrum,
Transgladiata nimium,
Dum vidisti filium
Emisisse spiritum;

Fac nos, pia, vulnerari
Amoris tui gladio
Et post mortem collocari
In caelesti stadio.