170. De V Gaudiis BMV.

1. Primum fuit gaudium,

cum, virgo, vidisti
Gabrielem nuntium

per quem cognovisti,
Quod deberes fieri

mater Iesu Christi,
De modo non dubitans

modum quaesivisti.

2. Secundum, cum puerum,

virgo, peperisti
Et erranti populo

lucem protulisti,
Cum tu, pura, puerum

pannis involvisti
Et pastores gaudii

testes recepisti.

3. Per tres magos gaudium

tertium sumpsisti,
Adorantes puerum

dum hos conspexisti
Atque trium munerum

causas perpendisti,
Regnum, mortem, gloriam

nati coniecisti.

4. Et ad quartum gaudium

tota conflexisti
Et ad risum prosperum

faciem solvisti,
Cum surgentem filium

amplexa fuisti,
A quo refrigerium

dulce recepisti.

5. Quintum, cum in corpore

caelos ascendisti
Et cum, quem lactaveras,

Deum conspexisti,
Tunc memor praesaepii

thronum stupuisti,
Cum ad nati dexteram

conregnans sedisti.

6. Ergo per haec gaudia,

mater magni Dei,
Gloriosa domina,

mater sanctae spei,
Apud ipsum memor sis,

oro, precor, mei
Meque reconcilia

sine fine ei.