175. De V Gaudiis BMV.

Salve, stella maris, via, virgo Maria, salutis,
Lux caecis, claudis gressus, facundia mutis.
Salve, munditiae virgo, matrona pudoris,
Mater, quam puritas ornat, regina decoris.
5. Nomine multiplici vera te scriptura decorat,

Quam mare, terra, polus, quam spiritus omnis adorat.
Tu flos, tu fructus, tu fons, rosa tu sine spina,
Spes miseris, fessis requies, aegris medicina,
Sol rutilans, aurora micans sine vespere, porta

10. lustitiae, per quam lux caelica prodiit orta.
Sponsa, thorus sponsi, thalamus, vinaria cella,
Remigium, per quod maris est vitata procella,
Virgula pigmenti redolens, paradisus amoenans,
Hortus conclusus, tu lux tenebrosa serenans.

15. Virga virens Aaron vellusque madens Gedeonis,
Quae vires veteris vicisti sola draconis.
Tu lac dulcore, tu balsama vincis odore,
Lilia candore praecellis meique sapore.
Tu fulgens, rutilans, tu candida, tu rubicunda,

20. Tu speciosa nimis et ab omni crimine munda.
Tu sacra Ierusalem, tu verae visio pacis,
Pace data machinas hostis confringe rapacis.
Arbor odorifera, fecundo praedita fructu,

Cuius ab aeterno gustus lavat omnia luctu.

25. Tu pratum vernans, tu palma, cupressus, oliva,
Munera divina donans tu dextra dativa.
Tu fulgens choris, candore thronus Salomonis,
Tu pretiosarum virtutum praedita donis.
Aeterni regis tu filia, mater, amica,

30. Tu nutrix, ancilla, soror, tu sponsa pudica,
Triste nihil redolens, lacrimosum nil sapuisti,
Singula qui solus dat gaudia, quem peperisti.
Gaudia gaudenti tibi singula cum famulentur,
Quinque tamen reliquis tibi gaudia pluris habentur.

35. Primus erat plausus, in quo gavisa fuisti,
Voce salutari Gabrielis dum meruisti,
Dum Christi matrem te nuntiat esse futuram
Atque puellare post partum ius habituram ;
Qualiter hoc esset faciendum, cauta petisti,

40. Credula de facto, sed scire modum voluisti.
Prospera succedent in plausu cuncta secundo,
Dum de te vita nascens est reddita mundo,
Pura paris puerum, proprium, virgo, genitorem,
Virginitatis habens cum matris iure pudorem;

45. Testantur partum pastores et venerantur,
Dignaque pastori summo praeconia dantur.
In trino plausu gaudes laetata beato,
Dam tria tres reges dant regi munera nato;
Reges ad fidei perducit praevia portum

50. Stella, novum regem quae signat in orbe subortum,
Carne latens deitas signatur per data tura,
Murra mors hominis, auro regalia iura.
Quartus erat plausus, dum postquam maesta dolebas
Defunctum natum redivivum laeta videbas,

55. In cruce cui passo maerendo condoluisti,
Laeta resurgendo natum complexa fuisti,
Victor ab inferno consurgens dum redit imis,
Arte nova suprema ligans postremaque primis,
Diruta restituens, reddens ablata, reducens

60. Perdita, post mortem vitae novitate relucens.
Quintus adest plausus, quo gaudens glorificaris,
Dum super angelicos cives assumpta laetaris,
Dum scandis loca laetitiae, loca plena favoris,
Quo manet aeterna requies ignara laboris ;

65. Prisca tui nati tibi dum memoratur egestas,
Iam tibi regnanti nimis est miranda potestas.
Gaudia plena vigent, ubi nunc in pace Iocaris,
Illuc virgineum thorum vexisse putaris ;
Nos ibi perpetua Christus mercede coronet

70. Atque tuis precibus plausus post tristia donet.

Suscipe, quaeso, meos per gaudia quinque precatus,
Dilue, quas merui, poenas et terge reatus.
Plaudens plangenti da gaudens gaudia flenti,
Post planctus plausus, post luctus laeta dolenti.

75. Mater, amica, soror et summi nata parentis,
Sponsa pudica, comes caelum terramque regentis,
Ad te clamantum votis assiste parata,
Protege, munda reos, miseris miserere, beata.
Quae tibi non valeo praeconia reddere digne,

80. Suscipe, quaeso, tamen quamvis indigna benigne.
Quas licit indignus tibi solvo, suscipe laudes,
Per te subveniat, cum quo per saecula gaudes.
Quinque per hos plausus devoti quam veneramur,
Te nati quinque per vulnera dira precamur,

85. Redde pium nobis, cum quo regnas sine fine,
Ne nos aeternae tradat post fata ruinae.
Sit tibi, mater, honor, aeternae ianua lucis,
Luci coniungens tenebras, aeterna caducis.
Gloria sit patri, laus proli spirituique

90. Sit decus, imperium, virtus perennis ubique.