181. De X Gaudiis BMV.

1. Gaude, dulcis o Maria,
Felix et beata,
Prae cunctis mulieribus
Nam es exaltata.

2. Gaude, nam per castitatem
Tuam meruisti,
Quod tu sola saeculorum
Regi placuisti.

3. Gaude, quia votum tuum
Deus acceptavit
Atque te prae ceteris
Solam adamavit.

4. Gaude, quia mundi rex,

Qui caelum, terram regit,
In sponsam sui thalami
Te solam praeelegit.

5. Gaude, virgo, quod vocaris

Regina saeculorum

Et in aevum dominaris

Choris angelorum.

6. Gaude, quia splendor es
Et saeculi lucerna
Et glorificata es
Laude sempiterna.

7. Gaude, per te christianum
Genus exaltatur,
Atque regnum supernorum
Per te reparatur.

8. Gaude, quod humanum genus
Per te liberatur
Atque lapsus angelorum
Per te restauratur.

9. Gaude, quia sola tu
Salvatrix miserorum
Es necnon refugium
Et salus peccatorum.

10. Gaude, quia portus es

Et spes desperatorum,
Es quoque solacium
Et mater afflictorum.

11. Gaude, quia Moysi
Legem implevisti
Atque novae gratiae
Vitam inchoasti.

12. Gaude, cunctae creaturae
Te laudant et adorant
Et misericordiae

Matrem te appellant.

13. Gaude, pia, gaude, felix,
Vale, iucundare,
Maria, virgo virginum,
Exsultans tu laetare.

14. Fac me, tuum servulum,
Tibi congaudere
Ac in tua gloria
In aevum te videre.