186. De XV Gaudiis BMV.

1. Gaude, virgo gloriosa,
Stirpe nata generosa,
Cuius sancta nativitas
Est gaudiorum novitas
Tam infimis quam superis;
Succurre nobis miseris,
Et tua generatio
Sit digna reparatio
Ortus nostri criminalis,
Tuis fove nos sub alis.

2. Gaude, virgo gloriosa,
Radix Iesse speciosa,
Cuius ortus puritas,
Cuius vitae sanctitas
Lucem dedit saeculo,
In te nam ut in speculo
Pura resplendet caritas,
Humilitas et castitas;
Tu per tuam sanctam vitam
Vitam nostram fac politam.

3. Gaude, virgo gloriosa,
Prophetarum vetus prosa,
Quae illud Ave caelicum
Per nuntium angelicum
Sola scire meruisti;
Precor te, o sponsa Christi.
Per hoc sollemne gaudium
Ut id Ave mellifluum
Ad laudem et ad gloriam
Tibi frequenter offeram.

4. Gaude, virgo gloriosa,
Virga Aaron frondosa,
Cuius castis visceribus
De pneumatis operibus
Deus purus et sincerus
Est conceptus homo verus ;
Da, ut nobis tuus Iesus
Sit in ore mellis esus,
In aure melos dulcius,
In corde semper iubilus.

5. Gaude, virgo gloriosa,
Miro modo gratiosa,
Elisabeth cum filio,
Cuius salutatio
Magnum infudit gaudium ;

Per illud da tripudium,
Ut relicta fide ficta
Te cum prole benedicta
Puro corde salutemus
Et sincere proclamemus.

6. Gaude, virgo gloriosa,
Terra sancta fructuosa,
Nam tu virgo concepisti,
Virgo manens peperisti,
Eburneis hunc manibus
Tractas, lactans uberibus;
Pro hoc dono singulari,
Virgo, da, ut in altari
Reverenter hunc tractemus
Et condigne manducemus.

7. Gaude, virgo gloriosa,
Iacob stella radiosa,
Ad praesaepe tui nati
Magi veniunt prostrati
Dona ferentes mystica ;
Per haec precamur gaudia,
Ut nos tus devotionis
Murraque contritionis,
Aurum fulvum caritatis
Locet regno claritatis.

8. Gaude, virgo gloriosa,
Tu lucerna luminosa,
Quae manna gestans aureum
Ulnis, lumeu fidelium,
Christum Dei, tuum natum,
Fers in templum praesentatum ;
Per hoc sublime gaudium
Exstirpa fraudes cordium,
Ut in pace Simeonis
Perfruamur caeli bonis.

9. Gaude, virgo gloriosa,
Institutrix studiosa,
Cum filium amiseras,
In templo quem inveneras
In medio doctorum
Docentem vias morum,
Cuius suavi praesentia,
Melliflua scientia
Prae cunctis iucundaris;
Nos rege, stella maris.

10. Gaude, virgo gloriosa,
Scripturarum dulcis glosa,
De filii infantia
Virilique constantia,
De eius baptizatione,
Trinitatis ostensione,
De signis et virtutibus,
Quae tu claris obtutibus
Frequenter conspexisti;
Nos salva voce Christi.

11. Gaude, virgo gloriosa,
Condolendo lacrimosa,
Cum vidisti tuum natum,
Captivatum, flagellatum,
Vulneratum, cruentatum,
Diris spinis coronatum,
Mortem crucis sustinentem,
Tamen semper patientem,
Ut nos salvaret miseros;
Fac nos a malis liberos.

12. Gaude, virgo gloriosa,
Paradisi vernans rosa,
Quae tantam post tristitiam
Tam vividam laetitiam
Pio corde concepisti,
Natum tuam cum vidisti
Carne glorificatum,
A morte suscitatum;
Per hoc confer tripudium
Aeternae vitae praemium.

13. Gaude, virgo gloriosa,
Contemplatrix iubilosa
Scandentis super sidera,
Quem tu, stella soligera,
Ventre paris virginali,
O nullius rea mali;
Da nobis illuc tendere,
Quo visus est ascendere
Noster Deus, noster pater,
Nostra caro, noster frater.

14. Gaude, virgo gloriosa,
Quam perfudit copiosa
Deitatis pluvia,
Nam dudum plena gratia
Adhuc in linguis igneis
Cum ceteris apostolis
Replens sacro pueumate;
Da, virgo, tali dogmate
Nos igniri caritate
Et fulciri castitate.

15. Gaude, virgo gloriosa,
Potens et imperiosa,
Quae corpore et animo
Assumpta es ad aethera,
Ubi nunc tota trinitas
Et velle tui unitas
Sunt unum in consilio ;
Pro nobis, mater, filio
Ut imperatrix impera,
Excelsa super sidera.