188. De VII Gaudiis BMV terrestribus et totidem caelestibus.

1. Gaude, virgo, mater Christi,
Quae per aurem concepisti

Gabriele nuntio;
Gaude, quae a Deo plena
Peperisti sine poena

Cum pudoris lilio.

2. Gaude, quod tres dona ferunt
Nato, quem adoraverunt

In felici gremio;
Gaude, virgo, praesentatus
Per te quod est tuus natus

Legis testimonio.

3. Gaude, quia tui nati,

Quem videbas mortem pati,

Fulget resurrectio;
Gaude, mater, ascendente
Christo caelos, te vidente

Motu fertur proprio.

4. Gaude, quod postipsum scandis,

Et est honor tibi grandis

In caeli palatia ;
Gaude, angelis praelata,
Trinitati proximata

Singulari gratia.
5. Gaude, virgo, laus cunctorum,
Super decus angelorum

Fulget tua gloria;
Gaude, dies ut ornatur
Sole, ita iucundatur

In te caeli curia.

6. Gaude, tuae voluntati
Affectus est trinitati
Favere ad omnia;
Gaude, te honorant caeli
Cives affectu fideli
Et oboedientia.

7. Gaude, tibi obsequentes
Terrae et caeli gaudentes

Sumunt per te praemia;
Gaude, honor cuius crescit
Semper atque finem nescit,

Nec hic nec in patria.

8. Ergo, cara mater Dei,
Duc nos reformatos ei

Ad festa caelestia,
Ubi fructus ventris tui
Per te nobis detur frui

In aeterna gaudia.