192. De VII Gaudiis caelestibus BMV.

1. Ave, virgo virginum,
Cuius solius gaudium
Et praecellens iucunditas
Vincit caeli divitias,
Summaque caeli agmina
Ornat tua praesentia;
Per hoc excellens gaudium
Et meritum eximium
Fac nobis placatum fieri
Dilectum tui uteri.

2. Ave, fulgens ut aurora,
Sicut diem sol tu sola
Cuncta reples gaudiis,
Quae torrente voluptatis
Et abysso divinitatis
Deliciose iam potaris,
Sine fine gratularis ;
Tu pro nobis, mater, ora,
Ut nobis donentur dona
Tuis in deliciis.

3. Ave, mundi imperatrix
Et caelorum gubernatrix,
Digna sceptro gloriae,
Cuius votis praeparantur
Caeli cives et laetantur
Frui tanta principe.

4. Ave, quam sic honoravit
Summus pater et amavit,
Ut cum sancta trinitate
Una sis in voluntate
Et clementer exaudiris
In cunctis, quae tu requiris ;
Per haec tam magna gaudia
Et merita insignia
Assis nobis hilariter
Iuvando nos fideliter,
In hora nostri exitus
Fugando nequam spiritus.

5. Ave, mater clementiae,
Nam tuae providentiae
Tuus commisit unicus,
Ut praemiis caelestibus
Dites, ut volueris,
Tuis datos obsequiis;
Cum colimus haec gaudia,
Cordi tuo tam suavia,
Sis nostri memor, domina,
Quos gravat carnis sarcina.

6. Ave, [virgo], quae dignior
Et caelis es sublimior,
Gratia ex te nati
Tu solis luce clarior,
Tu cunctis praecellentior,
Proxima trinitati,
Quo tota iam exuberas
In Deum et exsuperas
Uranicas naturas;
Per hoc excellens gaudium
Et meritum insolitum
Precare nobis veniam
Et requiem perpetuam.

7. Ave, cuius felicitas
Et gaudiorum novitas
Nunquam minoratur,
Et meritorum dignitas
Et praemii iucunditas
Semper augmentatur.

8. Mater Dei castissima,
Mitis, dulcis, piissima,
Propter haec et omnia
Gaudia, nunc in patria
Cum plena cordis laetitia
Confer nobis caelestia.