193. De VII Gaudiis caelestibus BMV.

1. O Maria virgo, gaude,
Tu es digna omni laude,

2. Quia per te angelorum
Chorus gaudet et sanctorum

Perenni laetitia,
Quos praecellis generosa,
Super omnes gloriosa,

Speciali gloria.
3. Gaude, gemma, templum Dei,
Per quam lucet lux diei

Solis de praesentia,
Per te magis illustratur,
Illustrata iucundatur

Tota caeli curia.

4. Gaude, lampas saeculorum,
Cui parent supernorum

Omnes cives curiae,
Vultum tuum deprecantes,
Tamquam matrem venerantes

Sui regis gloriae.
5. Gaude, cella fluens melle,
Cuius votum Christi velle

Sociavit caritas;
Quidquid tuae pietati,
Placet sanctae trinitati,

O pura virginitas.

6. Gaude, virgo, quae decoras
Tuos servos et honoras

Hic et in caelestibus,
Nos cum ipsis ad amoena
Paradisi laude plena

Transfer tuis precibus.
7. Gaude, rosa, princeps florum.
Super choros angelorum

Gloriosis laudibus
Exaltata iucundaris,
Trinitati sociaris

Et sanctorum civibus.
8. Gaude, cuius non marcescit
Laus et honor, non decrescit

Gaudiorum gaudium,
Iam secure iucundaris,
Iuncta Christo gloriaris

Super regni solium.

9. Omni laude, mater, digna,

Te laudanti sis benigna

In hac vita misera,
Imperatrix virtuosa,
Consolatrix viscerosa,

Nos a malis libera,

10. Et cum dies erit irae,
Fac tormenta non sentire

Haec colentes gaudia,
Ut nos tecum gloriemur,
Sine fine collaetemur

In caelesti patria.