203. In Assumptione BMV.

Petrus.

1. Salve, mater salvatoris,
Quae Deum deorum paris,
Salve, virgo singularis,
Quae vocaris stella maris.

Paulus.

2. Salve, vitae reparatrix,
Salve, vitae reseratrix,
Salve, verbi praedicatrix,
Salve, sancta legislatrix.

Andreas.

3. Salve, mater Iesu Christi,
Salve, virgo, vita mundi,
Sola digna quae fuisti
Ab angelo salutari.

Iacobus,

4. Gaude, soror insignita,
Gaude, mundi spes et vita,
Gaude, sacra margarita
In corona Iesu sita.

Iohannes.

5. Virga fronde fructuosa,
Virgo prole pretiosa,
Regis sponsa speciosa,
Gaude, gaudens florens rosa.

Thomas.

6. Gaude tu, quae genuisti,
Regem regum Deum caeli,
Quem adorant archangeli,
Quem angeli quemque throni.

Iacobus.

7. O deorum dominatrix,
Angelorum imperatrix,
O maestorum consolatrix,
Esto mihi miseratrix.

Philippus.

8. O domina et regina,
Casta, simplex, columbina,
Quae es mundi medicina,
Ad medendum me festina.

Bartholomaeus.

9. O Maria, gemma caeli,
Lux et luna paradisi,
A fluctibus huius saecli
Conserva nos et custodi.

Matthaeus.

10. Tu sanctorum psalmodia,
Tu martyrum melodia,
Tu militum letania,
Tu civium symphonia.

Simon.
11. Tu virgo virginum pia,
Tu lux vera, lex et via,
Tu mitis es, o Maria,
Tibi laus est Alleluia.

Thaddaeus.
12. Tu domina angelorum,
Tu regina seniorum,
Tu mamilla parvulorum,
Tu es mater orphanorum.

Simul omnes:

13. Salve, eia, te laudamus,
Te supplices exoramus,
Quia ad te suspiramus,
Te videre valeamus.