209. Iubilus Quindecim Graduum.

1. Ave, mater, quae primaevae
Mala pellis matris Evae,

Quae pepercit nemini ;
Ave, virgo, Dei porta,
De qua mundo salus orta,

Salus venit homini.

2. Ave, sacro verbo parens,
Verbo facta verbi parens,

Regis regum omnium ;
Ave, summi verbi mater,
Quod de summo misit pater
Pro salute gentium.

3. Ave, virgo, signum rubi,
Rubus ardet nec est, ubi
Flammae sint vestigia ;
Ave, virgo, sancto partu
Virgo mater, nulli par tu,
Patrem paris filia.

4. Ave, de qua mons praevisus,
De qua lapis est abscisus

Non manus officio ;
Ave, virgo, virga Iesse,
Virgo digna mater esse,

Non corrupta filio.

5. Ave, de qua lex, prophetae
Clarent cuncta dicta de te,

Clarum hoc mysterium ;
Ave, quondam repromissa,
Tunc promissa, mundo missa,

Modo plenum gaudium.

6. Ave, per quam salus mundi,
Mundus exit ab immundi

Praedonis dominio ;
Ave, cuius ortu nati
Homo primo liberati

Primo redit gaudio.

7. Ave, dulcis, salve, pia,
Nostra tota spes, Maria,

Atque vitae praemia;
Ave, digna salutari,
Quae in tuo salutari

Nato salvas omnia.

8. Ave, summa digna laude,
Summa mater, summe gaude

Paradisi sedibus ;
Ave, virgo, lux caelorum,
Lumen nobis beatorum

Confer tuis precibus.