9. De ss. Trinitate et Sacramento Altaris.
13. Oratio Paenitentis ad Deum.
16. De diebus tredecim vel quid Dominus in his operam egit.
26. De Transfiguratione Christi.
27. Incipit prologus rigmaticus in iubilum alaudae mysticae in nomine Domini.
40. Oratio pro peccatis ad Dominum Iesum.
43. Ad Christum et Mariam Oratio.
45. Verba Christi consolatoria.
47. Sequitur devotus rigmus dominicae passionis.
50. Dialogus de passione Domini. Christus ad hominem dicens:
53. Oratio bona et devota de passione Domini.
58. Carmen de Passione Domini.
60. Oratio de passione Domini et de compassione B. V.
65. Salutatio ad Faciem Domini.
72. Salutatio ad dolores singulorum membrorum Iesu Christi.
74. De sancta Cruce oratio devota.
85. Salutatio resurgentis Domini.
92. Oratio de Resurrectione Christi.
98. Salutatio ad Sacramentum Altaris.
106. Metra de Sacramento Eucharistiae.
107. Oratio bona ante Communionem.
108 a. Infra elevationem corporis Christi salutatio.
109. Ad elevationem sanguinis Christi.
110. Incipit oratio Iohannis presbyteri de sanguine Domini nostri Iesu Christi.
115. De Christo D. N. et Spiritu Sancto.
116. Te Deum de Spiritu Sancto.
128. De Nomine beatae Mariae V.
129. De Nomine beatae Mariae V.
131. De Nominibus Christi et Virginis.
137. Thalamus beatae Mariae V.
138. De Parta beatae Mariae V.
150. De Vocabulo Purificationis BMV.
163. Planctus beatae Mariae V.
164. Dialogus Mariae cum Populo.
188. De VII Gaudiis BMV terrestribus et totidem caelestibus.
189. De VII Gaudiis caelestibus BMV.
190. De VII Gaudiis caelestibus BMV.
191. De VII Gaudiis caelestibus BMV.
192. De VII Gaudiis caelestibus BMV.
193. De VII Gaudiis caelestibus BMV.
194. De XV Gaudiis caelestibus BMV.
205. Ad beatam Mariam V. Oratio vespertina.
206. Ad beatam Mariam V. Oratio vespertina.
207. Ad BMV. tempore pestilentiae.
1. Ave, divina trinitas,
Pater, verbum et spiritus
Atque Christi humanitas,
Plena cunctis virtutibus.
2. Ave, manna dulcissimum,
Fructus Mariae virginis
Atque nostrum refugium,
Christi corpus iudicis.
3. Ave, divina gloria,
Verbum sine principio
Et patris sapientia
Cum spiritu paraclito.
4. Ave, sancta divinitas
Atque una essentia,
In qua Christi humanitas
Aeterna est in gloria.
5. Ave, lumen de lumine,
Patris, verbi et spiritus,
Corpus Christi mirabile,
Natum pro nobis omnibus.
6. Ave, fides credentium
Et caritas sanctissima
Atque spes paenitentium
Cum perfecta laetitia.
7. Ave corona martyrum,
Apostolorum regula,
Confessorum et virginum
Palma atque victoria.
8. Ave, fides ecclesiae,
Honor Mariae virginis,
Quae fuit aula gratiae,
Plena divinis gaudiis.
9. Ave, summa scientia
Atque magister artium,
Dimitte nostra crimina
Propter sacrum mysterium.
10. Ave, caelorum canticum
Et splendor mundi, hodie
Exaudi preces supplicum,
Pater misericordiae.
11. Ave, nostra redemptio,
Fides sine velamine,
Aeterna ab initio,
Ubique sine crimine.
12. Ave, sancta iustitia
Atque sanctorum praemium,
Concede nobis gaudia
Per Christum tuum filium.
13. Ave, decus angelicum
Et trinitatis gaudium,
Honor caelestis curiae
Atque sanctorum omnium.
14. Ave, sacrum mysterium,
Aeternum sine macula
Atque ante luciferum
In maiestatis gloria.
15. Ave, semper in saeculum
Divina sancta hostia,
Animarum fidelium
Nutrimentum cura gratia.
16. Ave, corpus et anima,
Natum de matre virgine,
Atque sanguis in hostia,
Fons pietatis, veniae.
17. Ave, aeterna bonitas,
Gloriosa essentia
Et infinita sanctitas,
Angelorum laetitia.
18. Ave, dulcis memoria,
Iesu, salvator saeculi,
Te collaudat ecclesia
Sancta et mater fidei.
19. Ave, lumen immobile,
Splendor patris ingeniti,
Increatum mirabile,
Lux verbi et paracliti:
20. Ave, divina veritas,
Causa causarum omnium,
Et excelsa humanitas,
Fidelium solacium.
21. Ave, Iesu, amabilis
Ab omnibus fidelibus
Atque a sanctis angelis
Et a cunctis martyribus.
22. Ave, Christe, laudabilis
A sanctis confessoribus
Et a cunctis apostolis
Atque sacris virginibus.
23. Te deprecamur, Domine,
Deus creator omnium,
Concede nobis hodie
Remissionem criminum.
24. Benedicamus Domino,
Laudetur sancta trinitas,
De Christo Dei filio
Deo dicamus gratias.