TRACTATUS DE MODIS SIGNIFICANDI, SIVE GRAMMATICA SPECULATIVA
CAPUT VII De modis significandi activis In speciali
CAPUT XV De specie accidentali nominis
CAPUT XVI De genere accidentali Nominis
CAPUT XVII De numero accidentali Nominis
CAPUT XIX De casu grammaticali Nominis
CAPUT XXIV De significatione propria Pronominis
CAPUT XXX De Genere accidentali Verbi
De modis significandi essentialibus subalternis et specialissimis Participii
Sub modo essentiali generalissimo Participii ad modos subalternos descendamus. Dividitur autem modus esse indistantis, in tres modos subalternos. Primus modus est modus significandi per modum essegeneraliter respectu cujuslibet esse specialis. Et hic modus constituit Participium substantivum, ut ens, existens. Secundus est modus significandi per modum esse generalis respectu nominationis propriae tantum. Et hic modus constituit participium vocativum; ut nominatis, vocans. Tertius, est modus significandi per modum esse specialis actionis, vel passionis. Et hic modus constituit Participium Adjectivum.
Et subdividitur Iste modus esse specialis actionis, vel passionis In quatuor modos essentiales specialissimos. Primus est modus significandi per modum actionis tantum; et hic modus constituit Participium ab activo descendens, ut legens, amans. Secundus modus est modus significandi per modum passionis tantum; et hic modus constituit Participium a Verbo passivo descendens, ut amatus, lectus. Tertius est modus significandi per modum neutrius: et hujusmodi modus constituit Participium a verbo neutro descendens, ut stans, currens. Quartus est modus significandi per modum utriusque simul : et hic modus constituit Participium a Verbo communi descendens, ut criminans, criminatus, et hujusmodi.
Et sic patet, quod sicut modus essentialis generalissimus Participii dividitur In modos subalternos, ad specialissimos descendendo : sic etiam Participium, simpliciter sumptum, dividitur In participium substantivum, et adjectivum, et vocativum. Adjectivum subdivitur in activum, passivum, neutrum, et commune.