Capitulum XVI.

1. (Vers. 1.). Haec locutus sum vobis etc. Hic quinto discipulos suos armat ad patientiam,

ut scilicet propter tribulationes non deficiant, sed sustineant; propterea dicit: Haec loculus sum vobis, ut non scandalizemini: quia, sicut dicit Gregorius , " minus feriunt iacula, quae praevidentur, et tolerabilius mundi mala suscipimus, si contra haec per providentiae clypeum munimur ". Ideo praemunit eos de tribulatione futura.

2. (Vers. 2.). Absque synagogis facient vos: Actuum octavo : " Facta est persecutio magna in Ecclesia, quae erat Ierosolymis, et omnes dispersi sunt per regiones Iudaeae et Samariae ". Et ratio huius acerbae persecutionis subiungitur: Sed venit hora, ut omnis, qui interficit vos, arbitretur, se obsequium praestare Deo. Hora ista fuit tempus praedicationis Apostolorum ; tunc occidendo eos arbitrabantur se bene facere; unde exemplum est in Paulo, Actuum nono , qui " petiit litteras a principibus sacerdotum in Damascum, ut, si quos invenisset " etc. Talis autem cogitatio ortum habet ab infidelitate ; et ideo dicit:

3. (Vers. 3.). Et haec facient vobis, quia non noverunt Patrem neque me, id est propter ignorantiam et incredulitatem. Exemplum est in Paulo, primae ad Timotheum primo : " Fui blasphemus et persecutor et contumeliosus, sed ignorans hoc feci in incredulitate ". Contra igitur haec mala armat discipulos praedicens eis; unde dicit :

4. (Vers. 4.). Sed haec locutus sum vobis, ut, eum venerit hora eorum , qua scilicet persequentur, reminiscamini, quia ego dixi vobis. Reminiscentia et memoria verborum Dei multum valat ad omnia mala perferenda, e contrario oblivio nocet: ideo Deuteronomii octavo : " Cave, ne quando obliviscaris Domini Dei tui et negligas mandata eius ". Recordatio sermonum Dei hominem erigit et dirigit; unde dicitur Matthaei vigesimo sexto : " Recordatus est Petrus verbi Iesu, et egressus foras, flevit amare "; Psalmus: " Reminiscentur et convertentur ad Dominum omnes fines terrae ".