Capitulum XVII.

Tertio confirmantur discipuli orationis subsidio quadrupliciter.

1. Haec locutus est Iesus etc. Supra Dominus discipulos confortavit exemplo et eruditionis verbo; hic confortat orationis subsidio ; et hoc facit in praesenti capitulo, in quo ponitur Christi oratio. Et habet praesens capitulum quatuor partes. In prima Dominus sibi petit claritatis manifestationem. In secanda Apostolis petit sanctitatis conservationem, ibi : Pater, manifestavi nomen tuum etc. In tertia credituris per Apostolos petit conformitatem gratiae, ibi: Non tantum pro eis rogo, sed pro eis etc. In quarta, tam his quam illis perpetuitatem gloriae, ibi: Pater, quos dedisti mihi, volo etc.

In prima capituli puta Christus petit sibi claritatis suae manifestationem.

Primo igitur sibi petit claritatis suae manifestationem hoc ordine. Primo ponitur petendi. vel orandi modus; secundo, petitionis fructus; tertio, exaudiendi ratio: quarto, ipsa petitio.

2. (Vers. 1.). Petendi igitur modus insinuatur in hoc, quod Christus devote petebat et intente; in cuius signum oculos ad caelum levabat. Propterea dicit: Haec loculus est Iesus, quae praedicta sunt, et sublevatis oculis in caelum, per devotionem: supra undecimo : " Iesus, sursum elevatis oculis, dixit: Pater, gratias ago tibi, quoniam audisti me"; Psalmus: Ad te levavi oculos meos, qui habitas in caelis "; Threnorum tertio: " Levemus corda nostra cum manibus ad Dominum ".

Non solum devote, sed etiam humiliter; unde dixit: Pater. Deum vocat Patrem, quia ipsum honorat ut Patrem; supra octavo : " Honorifico Patrem meum, et vos inhonorastis me ".

Petiit etiam discrete; ideo dicit: Venit hora, clarifica Filium tuum. Discrete petebat, quia tunc clarificari petebat, quando opportunitas temporis advenerat. De hac hora saepe dictum est, supra secundo et septimo: " Nondum venit hora mea "; ideo clarificari per miracula nolebat, sed cum hora haec venerat, clarificari petebat.

In hoc igitur modo orandi instruimur, ut nos oremus devote, humiliter et discrete .

3. Ut Filius tuus etc. Tangitur hic petitionis fructus, et hic est duplex, scilicet divini nominis manifestatio et nostra beatificatio. Propter manifestationem divini nominis dicit: Ut Filius tuus etc.: ita, Pater, clarifica Filium tuum, ut et Filius tuus clarificet te, quia propter hoc moriebatur: unde supra duodecimo : " Pater, clarifica nomen tuum ".

Alius fructus est nostra glorificatio: propter quod dicit:

4. (Vers. 2.). Sicut dedisti ei potestatem omnis carnis, id est, ostende, quod dederis ei potestatem omnis carnis, id est ad salvandam omnem carnem: Matthaei ultimo : " Data est mihi omnis potestas in caelo et in terra ", et hoc ad salutem: Ut omne quod dedisti ei, per praedestinationem scilicet, det eis vitam aeternam, per glorificationem. Omne pro omni: supra sexto : " Haec est voluntas eius qui misit me Patris, ut omne, quod dedit mihi, non perdam ex eo, sed resuscitem illud in novissimo die". Et explanat, quae sit ista vita aeterna:

5. (Vers. 3.). Haec est , inquit, vita aeterna, ut cognoscant te, solum Deum verum, et quem misisti Jesum Christum; tertii Regum decimo: " Beati viri tui, et beati servi tui, bi qui stant coram te semper et audiunt sapientiam tuam ". " Nosse te consummata iustitia est", Sapieutiae decimo quinto: et gloria non est aliud quam iustitia consummata, quia " scire iustitiam et virtutem tuam radix est immortalitatis ", et ideo vitae aeternae.

6. (Vers. 4.). Ego te clarificavi. Notatur hic tertium, scilicet exaudiendi ratio; et hoc erat meritum Christi, quo merebatur glorificari sive clarificari ; ideo dicit: Ego te clarificavi super terram, propter hoc mereor a te clarificari: opus consummavi, quod dedisti mihi, ut facerem ; ideo consummavit, quia usque ad mortem obedivit; Lucae duodecimo: " Baptismo habeo baptizari; et quomodo coarctor, donec perficiatur "? De hac consummatione ad Hebraeos secundo: " Decebat eum, propter quem omnia, et per quem omnia, qui multos filios adduxerat in gloriam, auctorem salutis eorum per passionem consummare ". Et quia totum fecerat, ideo exaudiri debebat.

7. (Vers. 3.). Et nunc clarifica me tu, Pater.

Tangitur hic quartum, scilicet ipsa petitio, qua petit claritatis suac manifestationem; propter quod dicit: Et nunc clarifica me tu, Pater , apud temetipsum claritate, quam habui, priusquam mundus fieret , apud te; id est, illam claritatem manifesta, ut, sicut ab aeterno fui tibi aequalis, antequam mundus fieret , ita etiam sit aliis manifestum. Propter quod infra eodem dicitur: Ego clarificatus sum in eis ", id est in Apostolis, quia ipsi credebant ipsum aequalem Patri; supra decimo sexto: " Nunc credimus, quia a Deo existi"; supra primo: " Verbum erat apud Deum", scilicet aequale Deo, " et Deus erat Verbum ".