Capitulum XVIII.

Secundo agitur de his quae passionem concomitantur, quadrupliciter.

1. Haec cum dixisset etc. Supra egit de antecedentibus ad passionem, scilicet a fine undecimi ; hic agit de his, in quibus passio consummatur. Et quia in passione comprehensus est et iudicatus, occisus et sepultus ; ideo dividitur haec pars in quatuor partes. In prima agitur de Christi comprehensione: in secunda, de eius condemnatione, ibi : Et adduxerunt eum ad Annam: in tertia, de eius passione, ibi: Susceperunt autem Jesum etc; in quarta, de sepulturae conditione, in fine decimi noni, ibi: Post haec autem rogavit Pilatum.

Primo, de Christi comprehensione.

In prima igitur parte, in qua manifestatur, qualis fuit Christi comprehensio, tria ostenduntur: primo, quod fuit prodiliosa; secundo, quod voluntaria, ibi : Iesus autem sciens quae ventura erant: tertio, quod ignominiosa, ibi: Cohors ergo et tribunus etc.

In prima igitur parte procedit sic. Ostendit primo adventum Christi ad locum cognitum proditori; secundo, adventum proditoris ad illam locum, ibi : ludas ergo etc.

2. (Vers. 1.). Continuans igitur dicta dicendis ait: Haec cum dixisset, supple: quae praedicla sunt; , Iesus egressus est cum discipulis suis trans torrentem Cedron. Iste transitus praesignatus fuit secundi Regum decimo quinto : " Rex quoque transgrediebatur torrentem Cedron ". Genitivus pluralis est Cedron, id est trans torrentem cedrorum, quia ibi erant arbores illae. Egressus, de civitate, quia extra comprehensus et passus: ad Hebraeos ultimo: " Christus extra portam passus est " etc. Ubi erat hortus, in quem introivit ipse et discipuli eius, non tanquam fugiens vel abscondens se, sed quietem quaerens; Canticorum sexto : " Descendi in hortum meum, ut viderem "; Psalmus: "In pace factus est locus eius "; unde subdit:

3. (Vers. 2.). Sciebat autem et Iudas, qui tradebat eum, locum. Et ratio subditur: Quia frequenter Iesus conveniebat illuc cum discipulis suis. Victor: " Iudas hunc locum notaverat, eo quod ad illum Dominus saepe venire consueverat ". Locus iste erat in pede montis Oliveti; illuc ibat Iesus frequenter; Lucae vigesimo primo : " Erat diebus docens in templo, noctibus autem exiens morabatur in monte Oliveti ".

4. (Vers. 3.). Iudas ergo, cum accepisset cohortem. Hic notatur adventus proditoris cum talibus, qui possent capere et tenere et ducere. Ideo, cum accepisset cohortem, a gentilibus scilicet, et a principibus et Pharisaeis ministros, quia illis eum tradebat; Matthaei vigesimo sexto dicitur, quod " abiit ad principes sacerdotum et dixit illis: Quid vultis mihi dare, et ego vobis eum tradam " ? Venit illuc, quasi ipse ductor aliorum, cum laternis et

facibus et armis, ne posset latere in nocte: quia enim in tenebris ambulabant, ideo lumen a facibus mendicabant: Iob vigesimo quarto : " Si subito apparuerit aurora, arbitrantur umbram mortis: et sic in tenebris quasi in luce ambulant"; vel se defendere: et hoc faciebant, quia nihil divinum in eo credebant, sed humanam tantum potentiam.