Capitulum XI.

Quarto, Filius Dei ge manifestat perfectam reparatorem.

1. Erat autem quidam languens etc. Supra ostendit Dominus se curatorem et conservatorem et directorem, hic ostendit, se esse perfectum reparatorem ;quod fit in animae et corporis iterata coniunctione ; et hoc ostendit in Lazari quatriduani suscitatione; et durat haec pars usque circa finem capituli, ibi : Collegerunt ergo pontifices etc. Dividitur autem in duas: quia primo ponuntur antecedentia ad miraculum: secundo ponitur ipsum miraculum, ibi : Haec cum dixisset, voce magna clamavit.

pars prima, de antecedentibus ad miraculum.

Prima pars habet quatuor partes secundum quatuor antecedentia, quae determinat. In prima notatur denuntiatio infirmitatis: in secunda, adventus Medici, ibi : Deinde post haec dicit discipulis suis:

in tertia, intercessio sive meritum fidei, ibi: Martha ergo, ut audivit, quia Iesus venit etc: in quarta, exauditio pietatis, ibi: Iesus ergo, ut vidit eam plorantem.

Describitur ergo primo infirmitatis denuntiatio hoc ordine: primo tangitur languentis conditio; secundo, languoris denuntiatio: tertio, infirmitatis ratio: quarto, sanitatis dilatio .

2. (Vers. 1.). Languentis igitur conditio describitur a nomine , cum dicitur: Erat autem quidam languens Lazarus: a patria, cum subditur: o Bethania, in quem locum solebat Dominus venire ;a parentela, cum subditur: de castello Mariae et Marthae, sororum eius; Lucae decimo: "Intravit Iesus in quoddam castellum, et mulier quaedam, Martha nomine, excepit illum in domum suam". Et specialiter describit Mariam:

3. (Vers. 2.). Erat autem Maria, quas unxit Dominum unguento et extersit pedes eius capillis suis, in quo miro modo laudatur eius devotio: infra duodecimo : " Maria ergo accepit libram unguenti nardi pistici, pretiosi"; Lucae septimo: " Ecce, mulier attulit alabastrum unguenti ". Cuius frater lazarus infirmabatur, cuius etiam precibus fuit resuscitatus, sicut notatur infra eodem: "Iesus ergo, ut vidit Mariam plorantem ".

4. (Vers. 8.). Miserunt ergo sorores eius. Tangjtur hic secundum, scilicet infirmitatis denuntiatio facta a sororibus Lazari Domino: propter quod dicit: Miserunt ergo sorores eius ad eum, dicentes : Domine, ecce, quem amas infirmatur. Dominum vocant, non magistrum, quia petebant miraculum, non documentum: quasi dicant: Domine, qui potens es; Mattbaei octavo : " Domine, si vis, potes me mundares. Et rationem adiutorii exprimunt: Ecce, quem amas: Psalmus: " Sperent in te qui noverunt nomen tuum, quoniam non dereliquisti quaerentes te, Domine ". Et opportunitas est: infirmatur, ideo miserere: Psalmus: "Miserere mei, Domine, quoniam infirmus sum ".

5. (Vers. 4.). Audiens autem Iesus, dixit eis. Tangitur hic tertium, scilicet infirmitatis ratio, quam Dominus insinuat salutem petentibus: propter quod dixit eis: Infirmitas haec non est ad mortem, sed pro gloria Dei. Hoc dicit secundum divinam dispensationem: propter quod subdit: Ut glorificetur Filius Dei per eam, id est, per opus gloriam suam manifestet, quia in resuscitatione manifestavit potentiam suam, ac per hoc gloriam: unde supra secundo : " Hoc signum fecit Iesus et manifestavit gloriam suam" coram discipulis suis. Quare autem erat in eo manifestanda gloria, occulte innuit Evangelista: propter specialem amorem erga illas personas; propter quod dicit:

6. (Vers. 5.). Diligebat autem Iesus Martham et sororem eius Mariam et Lazarum. Ideo diligebat eos, quia ipsi diligebant eum, secundum illud Proverbiorum octavo : " Ego diligentes me diligo"; nec mirum, quia omnia, Sapientiae undecimo, diligis, Domine, quae sunt, et nihil odisti eorum quae fecisti".

7. (Vers. 6.). Ut ergo audivit. Tangitur hic quartum, scilicet curationis dilatio. Quamvis enim vellet curare, non tamen statim voluit, sed maluit exspectare. Propterea dicit: Ut ergo audivit, id est, postquam audivit, quia infirmabatur: tunc quidem mansit in eodem loco duobus diebus. Ideo Dominus, ab amicis vocatus, non statim venit, sed exspectat, ut instantius et ardentius requiratur: ad Colossenses quarto : "Orationi instate, vigilantes in ea".

8. Est multiplex infirmitas , scilicet gratiae honestatis amplectenda: et haec quadruplex: humilitatis: Proverbiorum trigesimo : Formicae, populus infirmus, qui praeparat in aestate cibum sibi: primae ad Corinthios primo: Infirma mundi elegit Deus et contemptibilia etc.; Matthaei undecimo: Quia abscondisti haec a sapientibus et prudentibus, et revelasti ea parvulis.

Paenitentiae; Ecclesiastici trigesimo primo : Infirmitas gravis sobriam reddit animam: de hac in Psalmo: Qui sanat contritos corde et alligat contritiones, vel infirmitates eorum, secundum aliam litteram.

Patientiae; secuodae ad Corinthios duodecimo : Virtus in infirmitate perficitur, scilicet patientiae, quia Iacobi primo: Patientia opus perfectum habet. Ideo dicitur secundae ad Corinthios duodecimo: Libenter gloriabor in infirmitatibus meis, ut inhabitet in me virtus Christi.

Compalientiae sive compassionis; secundae ad Corinthios undecimo : Quis infirmatur, et ego non infirmor? et primae ad Corinthios nono: Factus sum infirmis infirmus, ut infirmos lucrifacerem.

9. Item, est infirmitas perversitatis culpae fugienda: et haec quadruplex est, scilicet cupiditatis: Ecclesiastae quinto : Est et alia infirmitas pessima, quam vidi sub sole: divitiae congregatae in malum domini sui: pereunt enim in afflictione pessima.

Carnalis voluptatis; I saiae vigesimo quarto : Luxit vindemia, infirmata est vitis, ingemuerunt omnes, qui laetabantur corde.

Elationis; Isaiae vigesimo quarto : Infirmata est altitudo populi terrae, et terra infecta est ab habitatoribus suis.

Obstinationis: Deuteronomii septimo : Auferet Dominus omnes languores: et omnes infirmitates Aegypli pessimas, quas novisti, non inferet tibi. Infirmitates Aegypti sunt obstinationes in malo.

10. Item, est infirmitas difficultatis sequelas irelevando: et haec quadruplex: ad resistendum malo culpae; Threnorum primo : Infirmata est virtus mea: dedit me Dominus in manu, de qua non potero surgere; et Isaiae quadragesimo: Iuvenes in infirmitate sua cadent.

Ad sustinendum malum poenae; primae ad Thessalonicenses ultimo : Consolamini pusillanimes, suscipite infirmos: quocontra Ezechielis trigesimo quarto: Quod infirmum erat non consolidastis.

Ad aggrediendum bonum: Ecclesiastici trigesimo primo : In omnibus operibus tuis esto velox, et omnis infirmitas non occurret tibi; ad Romanos decimo quarto: Infirmum autem in fide suscipite.

Ad perseverandum in bono: primi Regum secundo : Quae multos habebat filios infirmata est. Hae omnes infirmitates sunt relevandae; ad Romanos octavo: Ipse Spiritus adiuvat infirmitatem nostram.

11. Item, est infirmitas passibilitatis poenae supportanda: et haec quadruplex, scilicet contractae propter praevaricationem; Psalmus : Qui propitiatur omnibus iniquitatibus tuis, qui sanat omnes infirmitates tuas: ad Romanos decimo quarto: Qui infirmus est olus manducet.

Assumtae ad nostram redemptionem; Isaiae quinquagesimo tertio : Vidimus eum novissimum virorum, virum dolorum et scientem infirmitatem.

Inflictae ad purgationem ; Psalmus : Multiplicatae sunt infirmitates eorum, postea acceleraverunt.

Illatae ad gloriae divinae manifestationem, ut supra eodem Infirmitas haec non est ad mortem, sed pro gloria Dei, ut glorificetur Filius Dei per eam.