QUAESTIONES.

40. Quaest. I. Sed quaeritur hic primo de hoc quod Dominus dicit Iudaeis: Solvite. Videtur, quod eis imperavit , ut se ipsum occiderent.

Respondeo: Dicendum, quod Scriptura imperativo modo aliquando utitur imperative, ut ibi: Deum time et mandata eius observa, Ecclesiastae ultimo . Aliquando praedictive, ut hic: Glossa: " Solvite, id est, solvetis ". Aliquando consultive: Matthaei decimo nono : Vade et vende omnia, quae habes, et da pauperibus. Aliquando permissive: Matlhaei octavo: Si eiicis nos hinc, mitte nos in porcos. Aliquando ironice: Ioannis decimo tertio: Quod facis fac citius, dixit Dominus ad Iudam de proditione.

41. Quaest. II. Item quaerit Chrysostomus de hoc, quod Dominus signum de resurrectione semper respondet Iudaeis: ut Matthaei duodecimo et decimo sexto dicitur, quod non dabitur eis signum nisi signum Ionae prophetae. Cum enim ipsi non intelligerent, ad quid eis hoc signum dabat? Et si dabat, quare non sic dabat, ut intelligerent?

Respondeo: Dicendum, quod signum hoc dabat eis, quia summum et quia occultum: summum, quia a morte posse liberare se ipsum etiam post mortem, hoc est omnium novorum novissimum, nobilissimum et mirabilissimum. Quia etiam occultum, dabat eis et aenigmatice dicebat, quia iusto iudicio ita se manifestabat, ut lateret, quousque post resurrectionem se manifestaret. Si enim omnino fuisset manifestatus, nequaquam fuisset mortuus: ideo mittit eos ad tempus resurrectionis. Et ideo loquebatur eis aenigmatice et etiam discipulis, quia, etsi tunc non intelligerent, postmodum carius erant intellecturi .

42. Quaest. III. Quaestio est: quare Dominus se templum dicit et templo se comparat?

Et respondet Augustinus , quod hoc non solum est propter inhabitationem Divinitatis, sed etiam propter similitudinem ad templum: quia, sicut templum quadraginta sex annis aedificatum est, sic foetus conceptus quadraginta sex diebus formatur, et illis multiplicatis per senarium, nascitur.

Sed hoc nihil valet ad propositum, ut videtur: quia corpus Christi ab instanti conceptionis fuit perfectum, et anima perfecta, et usum habuit liberi arbitrii.

Propter hoc dicendum, quod corpus perfici est duobus modis: vel organizatione, vel mole. Corpora alia a corpore Christi infra illud tempus vel in illo tempore aedificantur et perficiuntur, id est, ad perfectionem tendunt organizatione et male: corpus vero Christi tantum mole, non membrorum distinctione .