10. De sancto Aniano.

In 1. vesperis.

Antiphonae.

1. Resonet in patulo

Pectoris arcanum

Et cum dulci modulo

Laudet Anianum.

2. Ortus ex nobilibus

Urbe Viennensium

Decoravit moribus

Genus natalitium.

8. Spernens luxum saeculi

In aetate primula

Locum habitaculi

Elegit in cellula.

4. Virtutum Evurtii

Audito rumore

Sancti desiderii

Uritur ardore.

5. Adjunctus Evurtio

Minister devotus

Fungens sacerdotio

Abbas est promotus.

R. O conscendens margarita

De virgineo corpore,

Apostolis counita

Cum aureolae decore,

Quae sola es exaudita

Persecutorum tempore;

V. Age causam bodie

Derelicti gregis

In conspectu curiae

Sempiterni regis.

Ad Magnificat.

O praesul egregie,

Laus et decus praesulum

Regula justitiae,

Caritatis vinculum,

Ebur pudicitiae,

Honestatis speculum,

Forma sanctimoniae,

Sanctitatis titulum

Relinquens ecclesiae,

Esto propugnaculum

Praesentis familiae,

Conservans in saeculum

Assistentem hodie

Tuae laudi populum.

Ad Matutinum.

Invitatorium.

Plaudat devotio

Coetus Christiani

Sistens praeconio

Patris Aniani.

In 1. Nocturno.

Antiphonae.

1. Evurtius sanctus obitui

Jam approximatus,

Anianum petit substitui

Curae praesulatus.

2. Puer loquens erigit

Breve de altari,

Sic plebs sanctum eligit

Ex consensu pari.

3. Agrippinus supplicanti

Sancto respondens tumide

Corripitur in instanti

Grandi percussus lapide.

Responsoria.

1. Vergens ad vitae vesperum

Sanctus praesul Evurtius

Anianum presbyterum

Jam mortis suae praescius

Successorem et posterum

Fore monet attentius.

V. Quod Moyses Josue

Senio gravatus,

Hoc egit praecipue

Praesul memoratus.

2. Ad divinum oraculum

Fidelium devotio

Recurrens per infantulum

Trinae vocis indicio

Audit Dei famulum

Dignum pontificio.

V. Pandit ecclesiae

In usu sermonis

More Zachariae

In ortu praeconis.

3. Agrippino supplicat

Pro incarceratis,

Pietatem praedicat

Et jus libertatis,

Quod confestim indicat

Usus dignitatis.

V. Nam quos denegaverat

Pontificis precibus,

Hos subito liberat

Lapis sine manibus.

In 2. Nocturno.

Antiphonae.

1. Sanctus oculos abbatis

Liniens ex sputo

Vellit squammam caecitatis

Visu restituto.

2. In extremi spiritus

Labore compertum

De portis interitus

Revocat Mamertum.

3. Lapsus aedificio

Corpore confracto

Redditur officio

Signo crucis facto.

Responsoria.

1. Urbis Genabensium

Hunna gens incredula

Minatur excidium,

Tunc fugit gens tremula

Ad pastoris gremium

Metuens pericula;

V. Non hasta vel clipeo

Praesul hanc armavit

Sed cum Maccbabeo

Verbis animavit.

2. Dum muri vallant ambitum

Attila cruentus

Et cum eo satellitum

Malignans conventus,

Sanctus opponit sonitum

Suavis concentus.

V. Opponit obviam

Verba cantionis

Clangens in Madiam

More Gedeonis.

3. Divinae potentiae

Sentiens auxilium

Spreta gentis rabie

Conspuit in medium,

Sic triduae pluviae

Redundat profluvium.

V. Quod Elias potuit

Passibili corpore,

Hoc sanctus obtinuit

In hostili tempore.

In 3. Nocturno.

Antiphonae,

1. Dum sanctorum merita

Muro decantans invocat,

Irridentem mors subita

Virum blasphemum suffocat.

2. Mox ut Attila circuit

Civitatis moenia,

Sanctus in Hunnos exspuit

Et inundat pluvia.

3. Anno quo sanctus expulit

Populum praefatum.

Tellus accolis attulit

Fructum duplicatum.

Responsoria.

1. Christi miles inclitus

Cingulum militiae

Deponit emeritus

Ad bravium patriae

Evocatus coelitus.

V. Sol egressus nubilo

Transit hemisphaerium,

Cum sanctorum jubilo

Scandens regit solium.

2. Purgatum habens oculum

Vir anachorita

Raptum in mentis culmine

Videt in hac vita

Translatum Dei famulum

Apostolorum ordine

V. Assumptus cum Deo,

Contemplans hunc facie

Stat cum Mardochaeo

Inter primos acie.

3. In virtututum tumuli

Miranda frequentia

Catervatim populi

Currunt ad suffragia

Reportantes singuli

Dei beneficia.

V. Ossa Joseph pullulant,

Ubi visitantur,

Impetrant, quae postulant,

Hi, qui venerantur.

In Laudes.

Antiphonae.

1. Post transitum praesulis

Merita praeambula

Testantur in populis

Secuta miracula.

2. Robertus, rex Franciae,

Per sancti subsidium

Triumphat in acie

Belnae Lingonensium.

3. Mater, quae transmittitur

Per regem Francorum,

Salutem assequitur

Trium puerorum.

4. Qui balneo moritur

Puer suffocatus,

Sanus matri redditur

Sancto devotatus.

5. Gillebertus desipit

Incurrens amentiam,

Atque sanctus corripit

Ejus insolentiam.

Ad Benedictus.

A. Ave, stella matutina,

Vero soli convicina

Stellato palatio,

Laesae mentis medicina,

Vero morum disciplina,

Rege nos in stadio

Nos conservans a ruina

Et a morte repentina

Tuo patrocinio.

In 2. Vesperis.

Ad Magnificat.

A. O vas auri solidum,

Vas inviolatum,

Omni dono lapidum

Coelitus ornatum,

Qui servasti candidum

Vitae coelibalum.

Mentis nostrae horridum

Detergens reatum,

Fractum cor et tepidum,

Meritis orbatum,

Redde Deo placitum

Per tuum precatum.