27. De sancto Blaano.

In 1. Vesperis.
Super Psalmos.

A. Psalmorum modulos,

devota cantica,
Plebs laetis mentibus

pangat catholica
Die, quo transtulit

ad regna coelica
Blaani spiritum

phalanx angelica.

Ad Magnificat.

A. Salve gemma

coelestis gratiae
Dumblanensis

praesul ecclesiae,
Salve decus

et robur patriae,
Juva nos in

valle miseriae
Ducens tecum

ad montem gloriae.

Ad Matutinum.
Invitatorium.

Christus adoretur,

jubilus corde cumuletur,
Quo sunt praecipua

festa, Blaane. tua.

In 1. Nocturno.

Antiphonae.

1. Legem Dei meditatur,
Cujus prece suscitatur
Defunctus, qui sequebatur
Ipsum, donec viveret.

2. Dum ignem exstinguerat
livor malignorum,
Puer flatu confovet

summum digitorum,
Mox scintillae saliunt,
lumen fert in chorum.

3. Vere virtute praeditus,
Cujus coxit anhelitus
Piscem crudum, quem monitus
Tulit ales divinitus.

Responsoria.

1. Dies ista laudibus
expendatur tota
Ad honorem praesulis,
quem produxit Bota,
Cujus tot virtutibus
gaudet plebs devota.
V. Digitis ignem traxit,

Piscem crudem matri coxit
Flatu sacer parvulus.

2. Senex venerabilis
Cathanus laudabilis
Aetate teneram

doctrinis imbuit
Et mores docuit

Blaanum puerum
V. Profectu spiritus

et casti corporis
Explevit spatium

mox multi temporis.

3. Lampas ardoris,

vas lucis flosque pudoris,
Moestis solamen

praebens aegrisque juvamen,
Stella micans tenebris,
precibus mala dilue crebris,
V. Fac cordis sanae

fiant plagae, sancte Blaane.

In 2. Nocturno.

Antiphonae.

1. Fide stat solidus,
non corde duplici,
Defunctum suscitat
a morte triplici.

2. Pavit mirabili

messores pabulo
Mentis et corporis
dans cibos populo.

3. Secundus Moyses

petram percusserat,
Fons statim scaturit,
plebem refrigerat.

Responsoria.

1. Puer navicula

contexta vimine
Cum matre ponitur

absque solamine,
Sed pio regitur

divino numine.
V. Mater cum parvulo

fretum abhorruit,
Nam remis, remige

et velis caruit.

2. In hoc sancto Dominus

docet revereri
Omnes suos servulos,

quos habet tueri,
Qui quandoque pii sunt,

quandoque severi.
V. Mox ictu fulminis

prostrati corruunt,
Qui vaccas praesulis

injuste rapiunt.

3. Dum rediret peregre

vir Deo devotus,
Filium resuscitat

regis pie motus,
Vitam, visum, speciem

reddens orat totus.
V. Laudetur Dominus

in cunctis populis,
Per quem Blaanus tot

fulget miraculis.

In 3. Nocturno.
Antiphonae.

1. Fidem, mores instruens
Christi dilatavit
Cultum et, quod docuit,
signis confirmavit.

2. Aureo candelabro
ut lucet lucerna,

Sic Blaanus micuit
sitiens aeterna.
3. Columna marmorea
basi stans argenti
Fuit ejus castitas
cum fide ferventi.

Responsoria.

1. Gulosos damnat saeculi
Per disciplinam vituli,
Cui cum signum apposuit
Crucis, statim abstinuit,
Contentus semel sugere,
Docens nos parce vivere.
V. Sic columna stabilis
fulsit dei templum,
Vitae bonae posteris
relinquens exemplum.
2. Ignis mirificus,

ducens populos in amorem,
Piscis, apri, cervi

cunctis dant signa stuporem ;
V. Hinc resonent psalmi

meritis antistitis almi.
3. O felix transitus
Blaani praesulis,
Bota nunc jubilet

prae cunctis insulis,
Quae talem protulit
concivem angelis,
Quo domus Domini
fulget miraculis.
V. Jesu, nos adjuva
Blaani precibus,
Offensas diluens,
ditans virtutibus.

In Laudibus.

Antiphonae.

1. Laudes Deo debitas
devote reddamus,

Qui Blaani praesulis
festa celebramus.
2. Virum sanctum praedicans
livor novi fontis,
Signo satis obstupens
plebs monocerontis.
3. Mente vigil, corpore
dormiens ut leo,
Orans, psallens, praedicans,
sic adhaesit Deo.
4. Benedicant Dominum
omnes creaturae,
Dum pro sanctis singulae
mutant vim naturae.
5. Prosint nobis merita
beati Blaani,
Per quem aegri duplici
morbo fiunt sani.

Ad Benedictus.

A. Jesu dulcissime,

preces considera
Blaani praesulis,

non nostra scelera,
Ejus da meritis,

ut mens, vox, opera
Tecum nos collocent

in parte dextera.

In 2. Vesperis.
Ad Magnificat.

A. Ardens, lucens, eminens,

lampas castitatis,
Alme praesul, oleum

praebe pietatis,
Lumen praebe gratiae

sanans a peccatis,
Duc nos ad perpetuum

regnum claritatis.