12. De sancto Ansgario.

In 1. Vesperis.
Ad Magnificat.

A. Pastor apostolice,

lux Danorum Sueonumque,
Sedis Romanae

legatus in ultima terrae,
Ansgari, nobis

pius in Christo pater adsis.

Ad Matutinum.
Invitatorium.

Aeterno regi,

cum quo regnas, Ansgari,
Laudum nostrarum

fer Domino jubilum.

In 1. Nocturno.

Antiphonae.

1. Flos innocentiae,

Puer Ansebarius mente
Pura revelationibus
Divinis erat assuetus.

2.Ne puerili cederet
Levitati sanctae Dei
Genitricis voce per visum
Meruit admoneri.

3. Altius erudiendus
In divino timore,
Eductus de corpore
Examinatus est
Purgatorio igne.

Responsoria.
1. Lucifer Ansebarius

de Corbejensi coenobio
Lux nova emicuit

in barbarorum ergastulo
V. Destinatus ad gentes

sub sancti Petri patrocinio.
2. Apparuit Dominus

beato Anscliario per visum
Et consolabatur
servum suum
V. Super misericordia
et veritate sua.

3. Animam pueri

innocenter occisi
Vidit pius magister coelitus

inter martyres coronari,
V. Quem pie in Christo docuerat

sublimiter contemplatus est.

In 2. Nocturno.
Antiphonae.
1. Assumpta hinc splendide

Anima in luce

Claritatis aeternae

Exhibetur regi gloriae.
2. Prae ineffabili gaudio

Concinentium sanctorum

Obliviscebatur jam

Omnium dolorum.

3. Reversus in corpus omnem
Spem mundi abdicat penitus,
Aeternae gloriae
Amore iam saucius.

Resporisoria.

1. Fonte fluens vivo

divini sanctus amoris,
Errantum vitam

votis sitiebat anhelis,

V. Gentis barbaricae

quo pectora sicca rigaret.

2. Primus in ecclesia

factus metropolitana
Pastorale decus

subit archipontificatus,

V. Ut candelabro

late lux spirat ab alto.

3. Visum est sancto Anschario
Christum Dominum flagellari
Et se opposito verbera
accepisse pro ipso.
V. ''Hinc didicit, quod flagella
exprobrantium pro Christo
passurus esset.''

In 3. Nocturno.

Antiphonae.

1. Orante in spiritu
Beato Anschario
In fulguranti facie
Visus est Dominus
Jesus Christus.

2. Mox procidens
Coram Domino
Justificari meruit
Ei confitendo.

3. Missus in salutem gentium
Peregrinari gaudebat
Pro Christo concius sanctorum.

Responsoria.

1. Vir beatus se frustrari

gloria martyrii
Dum lugeret, super eum

facta est vox Domini:
Parce metu, non est dolus

apud regem saeculi,

V. Quidquid tibi repromittit
visio, percipies,
Ad coeleste, inquit, regnum
Cum corona venies.

2. O sancte Anschari, quamvis
sanguinem non fuderis,
Tamen bibisti calicem
dominicae passionis,
V. Inter tot fremitus
Barbarorum,
Inter tot discrimina vitae.

3. Hodie Nordalbingorum
pontifex, Anscharius,
Christe, tuis gloriatur

repromissionibus,
In sanctorum sempiternis
triumphans splendoribus.
V. Corbejae civis,

primas in finibus orbis,
Coelica regna tenet.

Ad Laudes.
Antiphonae.

1. Sanctus adhuc mortis

spirans in agone supremo
Cor oculosque pios
levat ad Dominum pietatis.

2. Mysterii vivi

sumens placabile pignus
Per Christi calicem

patrem rogat omnipotentem.

3. Da nobis, Domine,

pacem, dixit, veniamque
Per pretium mundi,

quo nos tibi conciliamur.

4. Inter carorum

lacrimantia cantica fratrum
Spiritus emigrans

mox lucis in arce corruscat.

5. O felix obitus,

cujus pia vita probatur,
Inde pios fletus

simul et pia gaudia miscent.

Ad Benedictus.
A. Anscharius Domino

se libans corde benigno:
Hanc animam commendo tibi,

Jesu pie, dixit,
Et flatum mittens

in coelica gaudia fudit.

In 2. Vesperis.
Ad Magnificat.
A. Respice nos, pater Anschari,
stella aurea nostri,
Et facie rutila,

qua solem conspicis altum,
Illustra tenebras

nostras, dux lucis ad ortum.