22. In Translatione s. Barnardi.

In 1. Vesperis.

Antiphonae.

1. Congaudeat ecclesia

Summa cum devotione,

Laeta psallens praeconia

Barnardi translatione.

2. Vivens in mundo fundavit

Templum istud mirifice

Et locum amplificavit

Adjacentem magnifice.

3. O Barnarde, pastor pie,

Aperi tuos oculos.

Respice nos hodie

Ad te clamantes famulos.

4. Sicut miles arma sua

Custodit a rubigine,

Sic, Barnarde, ossa tua

Praeservas a putredine.

5. Nam Reinaldo praecepisti

Corpus tuum exhumari

Nec non illud mandavisti

Honestius collocari.

Ad Magnificat.

A. Puerum suum suscepit

Israel devotissime,

Dum Barnardi corpus cepit

Redolere dulcissime ;

Omnes ergo voce pia

Decantemus Alleluja.

Ad Matutinum.

Invitatorium.

Translatus est in gloria

Pastor noster, Alleluja.

Ad Nocturnum.

Antiphonae.

1. Ad laudem tui nominis

Barnardique sit haec dies,

Christe, pater, fons luminis,

Cunctorum conditor qui es.

2. Dum thesaurus occultus quae-

ritur,

Puerilis manus conteritur,

Vino sacro post haec adspergitur

Et illaesa per cunctos cernitur.

3. In die translationis

Sanitatis obsequia

Data pluribus personis

Sunt divina potentia.

Responsoria.

1. Visione multis apparuit

Sacer praesul lapsis temporibus,

Ipsos quoque dulciter monuit

Pro levandis ipsius ossibus.

V. Finaliter uni de fratribus

Beatus vir comminatus fuit.

2. Romanensis populus gaudeat

Videns patrem suum exaltatum

Et patronum sibique studeat

Exhibere dignum famulatum.

V. Sacerdotum sidus irradiat,

Quis est homo, qui nunc suf-

ficiat

Exhibere dignum famulatum ?

3. O Barnarde, pater egregie,

Ad te puris spiramus cordibus

Rogantes, quod conserves hodie

Locum tuum cum habitantibus.

V. Festum tuum devote colimus,

Ut gubernes semper, deposci-

mus.

In Laudibus.

Antiphonae.

1. Indutus fortitudinem

Contra malignos spiritus

Dat odoris dulcedinem

Barnardus, praesul inclitus.

2. Servite in laetitia

Barnardo, nostro praesuli,

Ut impetret cum gratia

Salutem sui populi.

3. In terra deserta fuit.

Invia et inaquosa,

Et per tempora latuit

Margarita speciosa.

4. Benedicite omnia

Opera Dei Domino,

Qui Barnardum in gloria

Posuit sine termino.

5. In hoc festo tuba cum tympano,

Psalterium, chorus cum organo

Et cithara resonent vocibus

Cum cymbalis bene sonantibus.

Ad Benedictus.

A. Jusjurandum, quod juravit,

Hunc se locum servaturum,

Usque nunc ipse servavit

Et servabit in futurum,

Si pro posse honoremus

Eum in hac ecclesia ;

Ergo, fratres, nunc clamemus

Simul omnes Alleluja.

In 2. Vesperis.

Ad Magnificat.

A. Cum Barnardus in alto ponitur,

In brachio fecit potentiam

Deus, salus aegris impertitur,

Ad praesulis laudem et gloriam,

Et beatum perenniter omnes

Dicunt ex hoc generationes.