92. De s. Thoma Cantuariensi.

In 1. Vesperis.

Art Magnificat.

A. Pastor caesns

in gregis medio

Pacem emit

cruore proprio ;

Laetus dolor

in tristi gaudio,

Grex respirat

pastore mortuo ;

Plangens plaudit

mater in filio,

Quia vicit

victor sub gladio.

Ad Matutinum.

Invitatorium

Adsunt Thomae

martyris solemnia,

Virgo mater

jubilet ecclesia.

In 1. Nocturno.

Antiphonae.

1. Summo sacerdotio

Thomas sublimatus

Est in virum alium

subito mutatus.

2. Monachus sub clerico,

clam ciliciatus,

Carnis carne fortior

edomat reatus.

3. Cultor agri Domini

tribulos evellit

Et vulpes a vineis

arcet et expellit.

4. Nec in agnos sustinet

lupos deservire,

Nec in hortum olerum

vineam transire.

5. Exsulat vir optimus,

sacer et insignis,

Ne cedat ecclesiae

dignitas indignis.

C. Exsulantis pracdia

praeda sunt malignis,

Sed in igne positum

non exurit ignis.

Responsoria.

1. Studens livor

Thomae supplicio

Thomae genus

damnat exsilio,

Tota simul

exit cognatio,

V. Ordo, sexus,

aetas, conditio

Nullo gaudet

hic privilegio.

2. Thomas manum

mittit ad fortia,

Spernit damna,

spernit opprobria,

Nulla Thomam

frangit injuria,

V. Clamat cunctis

Thomae constantia:

Omne solum

est forti patria.

3. Lapis iste

sex annis tunditur,

Sic politur,

sic quadrus redditur,

Minus cedens

quo magis caeditur.

V. Auram fornax

probat nec uritur,

Domus firma

ventis non quatitur.

4. Post sex annos

redit vir stabilis,

Dare terrae

testae vas fragilis,

Christo vasis

thesaurum fictilis ;

V. Ne sit lupis

praeda grex humilis,

Se pro grege

dat pastor nobilis.

In 2. Nocturno.

Antiphoiiae.

1. Satanae satellites

irrumpentes templum

Inauditum penetrant

sceleris exemplum.

2. Strictis Thomas ensibus

obviam procedit,

Non minis, non gladiis

sed nec morti cedit.

3. Hosti pandit ostium

hostia futuras

Et pro domo Domini

stat in hostes murus.

4. Patrem nati perimunt

in sinu materno,

Rubet matris facies

sanguine paterno.

5. Fusum spargunt cerebrum

gladiis funestis,

Et invicta perstitit

victima coelestis.

6. Sol inclinans radios

ad occasum tendit.

Cum sol iste solium

coelicum conscendit.

Responsoria.

1. Jacet granum

oppressum palea,

Justus caesus

pravorum framea,

Coelum domo

commutans lutea.

V. Cadit custos

vitis in vinea,

Dux in castris,

cultor in area.

2. Ex summa

rerum laetitia

Fit summus

planctus in ecclesia

De tanti

patroni absentia,

Sed cum redeunt miracula,

Redit populo laetitia ;

V. Concurrit

turba languidorum,

Consequitur

gratiam beneficiorum.

3. Mundi florem

a mundo conteri,

Rachel plorans

jam cessa conqueri,

Thomas caesus

dum datur funeri,

Novus Abel

succedit veteri;

V. Vox cruoris,

vox sparsi cerebri

Coelum replet

clamore celebri.

4. Christe Jesu,

per Thomae vulnera,

Quae nos ligant,

relaxa scelera,

Ne captivos

ferant ad infera

Hostis, mundus

vel carnis opera ;

V. Per te, Thoma,

post laevae munera

Amplexetur

nos Dei dextera.

In 3. Nocturno.

Ad Cantica.

A. Felix locus,

felix ecclesia,

In qua Thomae

viget memoria,

Felix terra,

quae dedit praesulem,

Felix illa,

quae fovit exsulem ;

Felix pater,

succurre miseris,

Ut felices

jungamur superis.

Responsoria.

1. Ferro pressos

Thomas exonerat,

Vincla solvit

et seras reserat,

Sanat aegros,

obsessos liberat,

V. Placat bella,

tyrannis imperat,

Sedat fluctus

et flammas temperat.

2. Thomae cedunt

et parent omnia,

Morbi, pestes,

mors et daemonia,

Ignis, acr,

tellus et maria;

V. Thomas mundum

replevit gloria,

Thomae mundus

praestat obsequia.

3. Novis fulget

Thomas miraculis,

Membris donat

castratos masculis,

Ornat visu

privatos oculis,

V. Mundat leprae

conspersos maculis,

Solvit mortis

ligatos vinculis.

4. Jesu bone,

per Thomae merita

Nostra nobis

dimitte debita,

Domum, portam,

sepulchrum visita,

Et a trina

nos morte suscita;

V. Actu, mente

vel usu perdita

Pietate

restaura solita.

In Laudibus.

Antiphonae.

1. Granum cadit, copiam

germinat frumenti,

Alabastrum frangitur,

fraglat vis unguenti.

2. Totus orbis martyris

certat in amorem,

Cujus signa singulos

agunt in stuporem.

3. Aqua Thomae quinquies

varians colorem

In lac semel transiit,

quater in cruorem.

4. Ad Thomae memoriam

quater lux descendit

Et in sancti gloriam

cereos accendit.

5. Tu per Thomae sanguinem,

quem pro te impendit,

Fac nos, Christe, scandere,

quo Thomas ascendit.

Ad Benedictus.

A. Opem nobis,

o Thoma, porrige,

Rege stantes,

jacentes erige,

Mores, actus

et vitam corrige

Et in pacis

nos viam dirige.

In 2. Vesperis.

Ad Magnificat.

A. Salve, Thoma, virga justitiae,

Mundi jubar, robur ecclesiae,

Plebis amor, cleri deliciae,

Salve, gregis tutor egregie,

Salva tuae gaudentes gloriae.