1. De sanctis Apostolis.

Ascribitur Adamo de S. Victore.

1 Stola regni laureatus

Summi regis est senatus,

Coetus apostolicus,

2 Cui psallant mens et ora;

Mentis mundae vox sonora

Hymnus est angelicus.

3 Hic est ordo mundi decus,

Omnis carnis iudex aequus,

Novae praeco gratiae,

4 Ab aeterno praeelectus,

Cuius floret architectus

Ad culmen ecclcsiae.

5 Hi praeclari Nazaraei

Bella crucis et tropaei

Mundo narrant gloriam ;

6 Sic dispensant verbum Dei,

Quod nox nocti, lux diei

Indicant scientiam.

7 Onus leve, iugum mite

Proponentes semen vitae

Mundi spargunt terminis ;

8 Germen promit terra culta,

Foeneratur fruge multa

Fides Dei-hominis.

9 Paranymphi novae legis

Ad amplexum novi regis

Sponsam ducunt regiam,

10 Sine ruga, sine naevo

Permansuram omni aevo

Virginem ecclesiam.

11 Haec est virgo gignens foetus,

Semper nova, tamen vetus,

Sed defectus nescia ;

12 Cuius torus mens sincera,

Cuius partus fides vera,

Cuius dos est gratia.

13 Hi sunt templi fundamentum,

Vivus lapis et caementum

Ligans aedificium;

14 Hi sunt portae civitatis,

Hi compago unitatis

Israel et gentium.

15 Hi triturant aream

Ventilantes paleam

Ventilabri

iustitia,

16 Quos designant aerei

Boves maris vitrei

Salomonis

industria.

17 Patriarchae duodeni,

Fontes aquae gustu leni,

Panes tabernaculi,

18 Gemmae vestis sacerdotis ;

Hoc figuris signant notis

Novi duces populi.

19 Horum nutu cedat error,

Crescat fides, absit terror

Finalis sententiae,

20 Ut soluti a delictis

Sociemur benedictis

Ad tribunal gloriae.