23. De ss. Doctoribus Ecclesiae.

1 Alma mater ecclesia
Digne colit sollemnia
Doctorum lucis gratiae,

2 Qui verbi refulgentia
Ut caeli luminaria
Fugant umbram perfidiae.

3 Sacrum dogma ''Gregorii
''Melle dulcis eloquii
Corda devota reficit.

4 Rhetoricam ''Ambrosii
''Mens sagacis ingenii

Sub brevi verbo perspicit.

5 Augustinus haereticam
Labem per artem caelicam
Confundit non sophistice.

6 Ieronymus hebraicam
Veritatem historicam
Elucidat catholice.

7 Horum ergo dogma rectum
Est iter caeli directum
Sine quocunque devio;

8 Hunc coetum sursum erectum
Faciat Deo dilectum
Ipsorum deprecatio.