50. De sancta Agnete.

1 Animemur ad agonem
Recolentes passionem
Gloriosae virginis ;

2 Contrectantus sacrum florem
Respiremus ad odorem
Respersae dulcedinis!

3 Pulchra, prudens et illustris
Iam duobus Agnes lustris
Addebat triennium.

4 Proles amat hanc praefecti,
Sed ad eius virgo flecti
Respuit arbitrium.

5 Mira vis fidei,
Mira virginitas,
Mira virginei
Cordis integritas!

6 Sic Dei filius
Nutu mirabili
Se mirabilius
Prodit in fragili.

7 Languet amans, cubat lecto ;
Languor notus fit praefecto,
Maturat remedia:

8 Offert multa, spondet plura
Periturus peritura ;
Sed vilescunt omnia.

9 Nudam prostituit
Praeses flagitiis,
Quam Christus induit
Comarum fimbriis
Stolaque caelesti.

10 Caelestis nuntius
Assistit propius,
Cella libidinis
Fit locus numinis,
Turbantur incesti.

11 Caecus amans indignatur
Et irrumpens praefocatur
A maligno spiritu.

12 Luget pater, lugent cuncti,
Roma flevit pro defuncti
Iuvenis interitu.

13 Suscitatur ab Agnete,
Turba fremit indiscrete,
Rogum parant virgini ;

14 Rogus ardens reos urit,
In furentes flamma furit
Dans honorem numini.

15 Grates agens salvatori
Guttur offert haec lictori
Nec ad horam timet mori
Puritatis conscia.

16 Agnes, agni salutaris

Stans ad dextram gloriaris
Et parentes consolaris
Invitans ad gaudia.

17 Ne te flerent ut defunctam,
Iam caelesti sponso iunctam,
Is sub agni forma suam
Revelavit atque tuam
Virginumque gloriam.

18 Nos ab agno salutari
Non permitte separari,
Cui te totam consecrasti,
Cuius ope tu curasti
Nobilem Constantiam,

19 Vas electum, vas honoris,
Incorrupti flos odoris,
Angelorum grata choris,
Honestatis ac pudoris
Formam praebens saeculo,

20 Palma fruens triumphali,
Flore vernans virginali,
Nos indignos speciali
Fac sanctorum generali
Vel subscribi titulo.