62. De sancta Anna.

1 Caeli regem attollamus
Et in voces erumpamus
Laudum nunc per cantica,

2 Qui per Annam radiare
Sidus fecit salutare
In matre deifica.

3 Anna namque Deo grata,
Gratiosa sic vocata,
Diu mansit sterilis ;

4 Cum marito conversata
Prolis paene spe frustrata
Consternatur flebilis.

5 Ambo sic infructuosi
Vivunt tamquam odiosi
Suis contribulibus ;

6 Saepe quoque redarguti
Sunt ab ipsis quasi muti
Templi sacerdotibus.

7 Hinc pudore rubricati
Templum petunt adunati,
Culpas flentes scelerum ;

8 Votum illic emiserunt,

Dare Deo promiserunt

Nasciturum puerum.

9 Mox in fletu consolantur,
Bona quia nuntiantur
Adfatu angelico.

10 Anna tandem gravidatur
Et Maria generatur
Ordine mirifico.

11 Ergo tu cum matre, nata,
Dulci nexu foederata,
Culpis nos absolvite;

12 Tu nepoti tuque nato
Carnis hoste propulsato
Interventu iungite.