56. De sancto Andrea.

Ascribitur Adamo de S. Victore.

1 Exultemus et laetemur
Et Andreae delectemur
Laudibus apostoli!

2 Huius fidem, dogma, mores
Et pro fide tot labores
Digne decet recoli.

3 Hic ad lucem Petrum duxit,
Cui primum lux illuxit
Iohannis indicio ;

4 Secus mare Galilaeae
Petri simul et Andreae
Sequitur electio.

5 Ambo prius piscatores
Verbi fiunt assertores
Et forma iustitiae;

6 Rete laxant in capturam
Vigilemque gerunt curam
Nascentis ecclesiae.

7 A fratre dividitur
Et in partes mittitur
Andreas Achaiae.

8 In Andreae retia
Currit Dei gratia
Magna pars provinciae.

9 Fide, vita, verbo, signis
Doctor pius et insignis
Cor informat populi.

10 Ut Aegeas comperit,
Quid Andreas egerit,
Irae surgunt stimuli.

11 Mens secura, mens virilis,
Cui praesens vita vilis,
Viget patientia ;

12 Blandimentis aut tormentis
Non enervat robur mentis
Iudicis insania.

13 Crucem videns praeparari
Suo gestit conformari
Magistro discipulus.

14 Mors pro morte solvitur
Et crucis appetitur
Triumphalis titulus.

15 In cruce vixit biduum
Victurus in perpetuum
Nec vult volente populo
Deponi de patibulo.

16 Hora fere dimidia
Luce perfusus nimia
Cum luce, cum laetitia,
Pergit ad lucis atria.

17 O Andrea gloriose,
Cuius preces pretiosae,
Cuius mortis luminosae
Dulcis est memoria,

18 Ab hac valle tenebrarum
Nos ad illud lumen clarum,
Pie pastor animarum,
Tua transfer gratia.