53. De sancta Agnete.

1 Agnetis sollemnio
Psallat cum tripudio
Virginalis contio
Nisu toto.

2 In eius martyrio
Rependens cum gaudio
Grates Dei filio
Voce, voto.

3 Agnes, virgo nobilis,
Virgo venerabilis,
Dulcis et amabilis,
Virgo munda,

4 Virgo prudens, humilis,
Fidelis et stabilis,
In verbis mirabilis
Et profunda,

5 Sponsa regis gloriae,
Tu palmam victoriae
In annis infantiae
Meruisti.

6 Nunc gaudes in requie
Permanentis curiae
Coram dulci facie
Iesu Christi.

7 Tu patris potentiae,
Verbi sapientiae,
Spiritus clementiae
Cor parasti,

8 Dum carnis lasciviae,
Terrenae fallaciae,
Serpentis astutiae
Reluctasti.

9 Agnes, agni femina,
Nos intus illumina,
Radices extermina
Peccatorum ;

10 Singularis domina,
Post mundi gravamina
Transfer nos ad agmina
Beatorum.