40. De s. Achatio et sociis.

1 Concentus vox iubilaei
Sollemnizans regum regi
Penetret caelestia;

2 Dulcescant in aure Dei
Moduli, quos offert ei
Militans ecclesia.

3 Verbum caro, panis vivus,
Auctor vitae, caeli clivus,
Rex et sol iustitiae

4 Tractos ab aeterna lue
Sectatores fecit suae
Martyres victoriae,

5 Qua mors vitam superavit,
Humilitas expugnavit
Principem superbiae.

6 Hac palma milia decem
Evasere mundi faecem
Lacumque miseriae.

7 Frustra saevis, Adriane;
Quos trucidas inhumane,
Caritas vivificat:

8 Crux adversum te laborat,
Mundus clamat, sanguis plorat
Lex insontes vindicat.

9 Summa tot consortum Dei
Contingens in typo rei
Praetaxat mysterium ;

10 Lapsum redintegrat chorum

Deus per tot millenorum

Numerum denarium.

11 Decalogi lex et ordo
Psalterio decachordo
Concrepant harmonice;

12 Gaudet mens et lingua, quin
Neutra caret symphonia
Fidei catholicae.

13 Plebs praesaga deputavit
Manu forti nostro David
Vere decem milia,

14 Quae subtractos mortis viae
Confoederat ierarchiae
Crucis efficacia.

15 Promissus voce psalmistae
Multiplex est chorus iste
Dei decem milium ;

16 Tot bibentes agonistae
Passionis tuae, Christe,
Gratulantur fluvium.

17 Tamquam oves viotimantur,
Conspuuntur, flagellantur,
Vincti spinis coronantur,
Caritatis balsamum

18 Crucifixi, lanceati,

Laeti mortis mortem pati,
Sponsi sine patre nati
Propinant in thalamum.

19 Te sequentes, Iesu bone,
Corporali passione,
Te quaerentes in agone
Possident in gloria.

20 Quidquid volunt, impetrare
Possunt apud salutare,
Supplicibus suis dare
Quaesita praesidia.

21 O, qui tot triumphis estis
Compotes aulae caelestis,
Nos intentos vestris festis
Eximite, nam potestis,
Ab omni pernicie,

22 Ne repulsam tolleremus,
Dum dies adest extremus,
Ne cum reis exsulemus,
Sed cum dignis impetremus
Optionem gloriae.